Brukseli ashpërson tonin ndaj Beogradit: Parlamenti Evropian kërkon ndryshim të qasjes ndaj Vuçiqit

Parlamenti Evropian i ka dërguar mesazhe të ashpra Serbisë pas nderimeve shtetërore dhe ushtarake për Ratko Mlladiqin, ndërsa në Bruksel po shtrohet gjithnjë e më hapur pyetja nëse Bashkimi Evropian mund të vazhdojë marrëdhënien e deritanishme me autoritetet e Aleksandar Vuçiqit.

Në debatin në Parlamentin Evropian, zyrtarët evropianë kritikuan glorifikimin e Ratko Mlladiqit, i dënuar përfundimisht për gjenocid, krime lufte dhe krime kundër njerëzimit.

Komisionerja evropiane për Zgjerimin, Marta Kos, i cilësoi skenat nga varrimi i Mlladiqit si jashtëzakonisht shqetësuese, veçanërisht për shkak të pjesëmarrjes së ministrave të Qeverisë së Serbisë dhe politikanëve nga Republika Srpska, të cilët i bënë nderime një krimineli të dënuar lufte.

“Ne nuk mund të negociojmë për dinjitetin e viktimave të gjenocidit dhe krimeve të luftës”, deklaroi Kos, duke theksuar se Evropa nuk i kërkon Serbisë të heqë dorë nga identiteti apo historia e saj, por të përballet sinqerisht edhe me kapitujt e saj më të errët.

Parlamenti Evropian kërkon ndryshim të qasjes ndaj Serbisë

Eurodeputeti kroat Ivo Davor Shtir vlerësoi se politika e deritanishme e BE-së ndaj Serbisë ka qenë “e vakët dhe joefektive”.

Ai tha se në familjen evropiane nuk ka vend për ata që glorifikojnë Mlladiqin, duke shtuar se nuk duhet të ketë as para evropiane për ata që nuk distancohen nga politika e Slobodan Millosheviqit.

Edhe më i drejtpërdrejtë ishte raportuesi i Parlamentit Evropian për Serbinë, Tonino Picula, i cili kritikoi qëndrimin e autoriteteve në Beograd ndaj kriminelëve të luftës.

Picula vlerësoi se Aleksandar Vuçiqi e përcolli një kriminel lufte me nderime shtetërore, ndërsa me një tjetër, Vojislav Sheshelin, arriti marrëveshje për bashkëpunim parazgjedhor.

Për këtë arsye, në Parlamentin Evropian po shtrohet gjithnjë e më fort pyetja nëse BE-ja duhet t’i vazhdojë negociatat me Serbinë nën pushtetin aktual.

Marta Kos, megjithatë, theksoi se pamjet nga varrimi i Mlladiqit nuk përfaqësojnë shoqërinë serbe në tërësi.

Ajo tha se ka marrë letra nga qytetarë të Serbisë që e refuzojnë glorifikimin e kriminelëve të luftës dhe porositi se një Serbi e tillë meriton mbështetje dhe vendin e saj në Evropë.

Në të njëjtën kohë, zyrtarët evropianë këmbëngulin se integrimi evropian nuk mund të ndahet nga përballja me krimet e luftës, revizionizmin historik dhe respektimin e viktimave.

Krimineli I luftes, Ratko Mlladiq vdiq më 27 gusht në paraburgim në Hagë, ku po vuante dënimin me burgim të përjetshëm. Ai u varros më 7 shtator në Beograd, me nderime ushtarake dhe shtetërore.

/The Geopost/