Serbia dhe Kina thellojnë bashkëpunimin në siguri, policët serbë nisin patrullimet në Hainan

Serbia dhe Kina po zgjerojnë bashkëpunimin në fushën e sigurisë, në një kohë kur Beogradi vazhdon të forcojë lidhjet strategjike me Pekinin.
Tetë zyrtarë të Ministrisë së Punëve të Brendshme të Serbisë janë dërguar në provincën Hainan, në jug të Kinës, për të marrë pjesë në patrullime të përbashkëta me policinë kineze.

Misioni, i cili ka nisur të premten dhe do të zgjasë dy javë, zhvillohet me ftesë të Ministrisë së Sigurisë Publike të Kinës, raportoi CCTV News.
Policët kinezë dhe serbë do të formojnë ekipe të përbashkëta për patrullime në zonat turistike të Sanyas dhe Haikout.
Sipas autoriteteve kineze, qëllimi është garantimi i sigurisë së qytetarëve të të dyja vendeve gjatë udhëtimeve dhe thellimi i bashkëpunimit dypalësh në zbatimin e ligjit.

Zyrtarët serbë pritet të ndihmojnë policinë kineze në trajtimin e shqetësimeve të shtetasve të Serbisë në Kinë dhe të ofrojnë këshilla në çështjet policore.
Ky zhvillim vjen në kuadër të raporteve gjithnjë e më të afërta ndërmjet Serbisë dhe Kinës, të cilat gjatë viteve të fundit kanë zgjeruar bashkëpunimin përtej ekonomisë dhe investimeve, duke përfshirë teknologjinë, mbrojtjen dhe sigurinë.

Afrimi Pekin-Beograd është reflektuar edhe përmes kontakteve të shpeshta politike në nivelin më të lartë. Presidenti serb Aleksandar Vuçiq vizitoi Kinën në maj të këtij viti, ku u takua me presidentin kinez Xi Jinping.

Gjatë takimit, dy liderët riafirmuan atë që Pekini dhe Beogradi e përshkruajnë si partneritet strategjik dhe diskutuan zgjerimin e mëtejshëm të bashkëpunimit ndërmjet dy vendeve.

Serbia është një nga partnerët kryesorë të Kinës në Ballkan, ndërsa Pekini ka rritur gjatë viteve të fundit praninë ekonomike dhe politike në këtë vend.
Bashkëpunimi ndërmjet tyre përfshin gjithashtu sektorin e mbrojtjes. Serbia ka blerë nga Kina sisteme të mbrojtjes ajrore FK-3 dhe dronë luftarakë, duke u bërë një nga vendet evropiane me bashkëpunimin më të zhvilluar ushtarak me Pekinin.

Patrullimet e përbashkëta policore në Hainan shtojnë kështu edhe një dimension tjetër në marrëdhëniet Serbi-Kinë, në një periudhë kur Beogradi vazhdon politikën e balancimit ndërmjet procesit të integrimit në Bashkimin Evropian dhe partneriteteve strategjike me Kinën dhe aktorë të tjerë jashtë Perëndimit./TheGeopost