RT Balkan dezinformon në rastin e dënimit të Lazoviqit për krime lufte

Portali RT Balkan, pjesë e propagandës së rrjetit shtetëror rus, pas vendimit të Gjykatës Themelore në Prishtinë, në kuadër të sistemit juridik të Kosovës, për ta dënuar Srdan Lazoviqin me 12 vjet e gjysmë burg për krime lufte, ka dezinformuar duke e quajtur këtë vendim “vazhdim të torturës së Prishtinës”.

Sipas raportimit të RT Balkan:

“Vazhdon tortura e Prishtinës: Serbit 12 vjet burg, ‘një nishan që shëtit’ si provë kyçe. Asnjë nga dëshmitarët në gjykim nuk ka mundur ta identifikojë Srđan Lazoviqin si pjesëmarrës në krimin e supozuar të vitit 1998, por kjo nuk e ka interesuar gjykatën”, shkruan RT Balkan.

Analizë:

RT Balkan dezinformon duke pretenduar se vendimi gjyqësor është marrë vetëm mbi bazën e një prove të vetme – nishanit – të cilin e quan “qesharak”.

Në realitet, identifikimi është bërë përmes analizës forenzike të fotografive nga viti 1998. Përveç karakteristikave fizike, gjykata ka marrë parasysh edhe dëshmitë e të mbijetuarve, të cilët kanë përshkruar rolin e të akuzuarit në torturimin e civilëve në shkollën e fshatit Panorc.

RT Balkan gjithashtu dezinformon kur pretendon se dëshmitarët nuk e kanë identifikuar Lazoviqin. Sipas raportimeve nga gjykimi, dëshmitarët kanë dhënë deklarata para prokurorisë dhe gjykatës lidhur me ngjarjet.

Mbrojtja ka tentuar ta kontestojë identifikimin për shkak të kalimit të kohës (26 vjet), por RT Balkan e keqpërdor këtë argument si “provë” të pafajësisë, duke injoruar provat materiale dhe dëshmitë e tjera.

Po ashtu, RT Balkan dezinformon kur përdor shprehjen “vazhdon tortura e Prishtinës”, pasi drejtësia për krimet e luftës nuk zbatohet vetëm ndaj serbëve, por edhe ndaj shqiptarëve dhe të dyshuarve të tjerë – fakt që nuk përmendet në mediat propagandistike serbe dhe ruse.

Në realitet, gjykimi ndaj Lazoviqit ka qenë i hapur për publikun, me praninë e mbrojtësve që i ka zgjedhur vetë i akuzuari dhe nën monitorimin e organizatave ndërkombëtare.

Në mediat ndërkombëtare dhe në Kosovë, askund nuk pretendohet se dëshmitarët nuk e kanë identifikuar të akuzuarin.

The Geo Post