Informeri serb me dezinformatën e radhës: Suedia po përgatitet ta sulmojë Rusinë

Gazeta serbe “Informer” ka bërë një dezinformatë në një artikull të publikuar më 12 mars në adresë të Suedisë pas anëtarësimit të saj në NATO duke shpifur që ajo po përgatit një sulm.

Çka shkroi Informer?

“Bujë në Suedi, ata sapo hynë në NATO, dhe tashmë po përgatiten për një sulm rus! Është pika më e rëndësishme në Evropë. Suedia është gati të forcojë mbrojtjen e ishullit më të rëndësishëm në Detin Baltik, i cili mund të bëhet një objektiv kryesor rus në një konflikt të mundshëm me NATO-n dhe Rusinë. Anëtarësimi i Gotland dhe Suedisë në NATO ndryshon të gjithë llogaritjen. Kjo do të thotë se kontrolli strategjik mbi Detin Baltik do t’i kthehej NATO-s. Kjo është një çështje që Rusia e kupton shumë mirë. Suedia ka njoftuar tashmë planet për të dërguar një batalion luftarak në Letoni, e cila është vetëm 200 kilometra nga Finlanda”.

Analiza:

Suedia vendosi të anëtarësohej në NATO pas sulmit të Rusisë në Ukrainë, i cili shkaktoi pasiguri te suedezët dhe jo për të planifikuar një sulm rus sikurse thotë gazeta propagandistike serbe. Suedia iu bashkua NATO-s më 7 mars, dy vjet pasi pushtimi rus i Ukrainës e detyroi atë të rimendonte politikën e saj të sigurisë kombëtare dhe të arrinte në përfundimin se mbështetja për aleancën ishte garancia më e mirë e sigurisë së kombit skandinav.

Sekretari i Shtetit Antony Blinken teksa mori dokumentet e pranimit të Suedisë nga kryeministri i Suedisë Ulf Kristersson tha se “gjithçka ndryshoi” pas pushtimit të plotë të Rusisë në Ukrainë, duke cituar sondazhet që tregojnë një ndryshim masiv në opinionin publik suedez pro anëtarësimit në NATO.

“Suedezët kuptuan diçka shumë të thellë: se nëse Putini do të ishte i gatshëm të përpiqej të fshinte një fqinj nga harta, atëherë ai mund të mos ndalej me kaq”, ishte shprehur Blinken.

/G. Venhari, The Geopost