Trump kërcënon Iranin me sulme të reja: Ndaloni Hezbollahun ose do të goditeni “edhe më fort”

Presidenti i Shteteve të Bashkuara, Donald Trump, ka paralajmëruar Iranin se mund të përballet me sulme të reja amerikane nëse nuk ndalon aktivitetet e Hezbollahut në Liban.

Përmes një postimi në platformën Truth Social, Trump akuzoi Teheranin se vazhdon të mbështesë grupin paramilitar Hezbollah, i cili prej kohësh konsiderohet aleat i Iranit dhe është i përfshirë në përplasjet me Izraelin.

“Irani duhet t’i ndalojë menjëherë përfaqësuesit e tij të paguar mirë në Liban që të shkaktojnë probleme”, shkroi Trump.

Ai paralajmëroi se në të kundërtën, SHBA-ja mund të ndërmarrë veprime të reja ushtarake kundër Iranit.

“Nëse nuk e bëjnë këtë, ne do ta godasim Iranin shumë fort përsëri, ashtu siç bëmë javën e kaluar, vetëm më fort”, shtoi presidenti amerikan.

Deklarata e Trump vjen në një periudhë tensionesh të vazhdueshme në kufirin mes Izraelit dhe Libanit, ku forcat izraelite dhe Hezbollahu kanë shkëmbyer sulme të herëpashershme.

Sipas zyrtarëve lokalë në Liban, që nga arritja e marrëveshjes mes Iranit dhe Shteteve të Bashkuara, sulmet izraelite kanë shkaktuar vdekjen e 47 personave në territorin libanez. Ndërkohë, Hezbollahu raportohet se ka vrarë pesë ushtarë izraelitë gjatë përleshjeve.

Kërcënimi i fundit i Trump sinjalizon se Uashingtoni mbetet i gatshëm të ushtrojë presion të drejtpërdrejtë ndaj Iranit për aktivitetet e grupeve aleate të tij në rajon, duke rritur frikën për një përshkallëzim të mëtejshëm të tensioneve në Lindjen e Mesme.

The GeoPost