Vritet në sulm ajror shefi i Marinës së Gardës Revolucionare – ishte figurë kyçe e kontrollit mbi Ngushticën e Hormuzit

Shefi i Marinës së Korpusit të Gardës Revolucionare Islamike të Iranit, Alireza Tangsiri, raportohet se është vrarë në një sulm ajror, në një zhvillim që pritet të rrisë tensionet në rajon.

Sipas një zyrtari izraelit, Tangsiri, 64 vjeç, u godit me bombë në qytetin portual Bandar Abbas, në jug të Iranit, pranë Ngushticës së Hormuzit – një nga rrugët ujore më të rëndësishme për tregtinë globale të energjisë.

Burimi i tha The Jerusalem Post se Tangsiri ishte një figurë kyçe në ruajtjen e kontrollit iranian mbi këtë arterie strategjike, përmes së cilës kalon rreth një e pesta e eksporteve globale të naftës.

Nën komandën e tij, Marina iraniane kishte intensifikuar aktivitetet ushtarake në rajon, duke përfshirë minimin e ngushticës dhe sulmet ndaj anijeve të konsideruara armiqësore.

I emëruar në krye të Marinës së Gardës Revolucionare në vitin 2018, Tangsiri kishte shtuar retorikën dhe veprimet ushtarake gjatë javëve të fundit. Vetëm disa ditë më parë, ai kishte paralajmëruar se objektet e naftës të lidhura me Shtetet e Bashkuara do të trajtoheshin si objektiva ushtarake.

Zhvillimi vjen në një moment kur presidenti i SHBA-së, Donald Trump, po shtyn për një përfundim të shpejtë të konfliktit me Iranin.

Sipas burimeve nga Shtëpia e Bardhë, Trump ka kërkuar që lufta të përfundojë brenda disa javësh dhe para datës 14 maj, kur pritet të zhvillojë një takim me presidentin kinez Xi Jinping.

Trump ka deklaruar se Irani është duke zhvilluar bisedime në prapaskenë dhe është i interesuar për një marrëveshje, por heziton ta pranojë publikisht.

“Ata po negociojnë dhe duan shumë të bëjnë një marrëveshje, por kanë frikë ta thonë këtë, sepse mendojnë se do të përballen me reagim nga populli i tyre”, ka thënë ai.

Vrasja e Tangsirit konsiderohet si një tjetër goditje ndaj strukturave ushtarake iraniane, në kuadër të fushatës së përbashkët të SHBA-së dhe Izraelit.

Situata mbetet e tensionuar, ndërsa zhvillimet e fundit mund të kenë ndikim të drejtpërdrejtë edhe në tregjet globale të energjisë dhe sigurinë rajonale.

The Geopost