Pentagoni: Ushtria amerikane e gatshme të zbatojë çdo vendim të Trumpit për Iranin

Shefi i Pentagonit, Pete Hegseth, deklaroi të enjten se ushtria e Shteteve të Bashkuara është e gatshme të zbatojë çdo vendim që presidenti Donald Trump mund të marrë lidhur me Iranin, me qëllim që Teherani të mos ndjekë zhvillimin e armëve bërthamore.

Deklarata e Hegseth erdhi në një kohë kur një prani e konsiderueshme e forcave ushtarake amerikane është grumbulluar në rajon, duke rritur ndjeshëm tensionet mes Uashingtonit dhe Teheranit. Gjatë një mbledhjeje të kabinetit, vetë presidenti Trump e pyeti Hegseth-in që të komentonte mbi situatën aktuale dhe gatishmërinë e ushtrisë amerikane.

“Ata nuk duhet të ndjekin zhvillime bërthamore. Ne do të jemi të përgatitur të ofrojmë çfarëdo që ky president pret nga Departamenti i Luftës”, tha Hegseth, duke iu referuar riemërtimit jozyrtar të Departamentit të Mbrojtjes nga administrata Trump.

Sipas zyrtarëve amerikanë, presidenti Trump aktualisht po shqyrton opsionet e tij strategjike, por ende nuk ka marrë një vendim përfundimtar nëse SHBA-të do të ndërmarrin një sulm të drejtpërdrejtë kundër Iranit.

Tensionet mes Shteteve të Bashkuara dhe Iranit janë përshkallëzuar pas shtypjes së përgjakshme të protestave në mbarë Iranin nga autoritetet klerike në javët e fundit. Protestat, të nxitura nga vështirësitë ekonomike dhe represioni politik, u shoqëruan me ndërhyrje të ashpra të forcave të sigurisë iraniane, çka ka nxitur reagime të forta nga Uashingtoni.

Presidenti Trump ka kërcënuar vazhdimisht me ndërhyrje nëse regjimi iranian do të vazhdojë vrasjen e protestuesve. Megjithatë, demonstratat janë zbehur gradualisht javët e fundit.

Trump ka paralajmëruar gjithashtu se Shtetet e Bashkuara do të veprojnë nëse Irani rifillon programin e tij bërthamor, pas sulmeve ajrore të muajit qershor nga forcat izraelite dhe amerikane, të cilat kishin në shënjestër instalimet kryesore bërthamore të Iranit.

Nga ana tjetër, autoritetet iraniane u zotuan të enjten për një “përgjigje shkatërruese” ndaj çdo sulmi të mundshëm nga SHBA-të apo aleatët e saj, duke thelluar edhe më tej retorikën kërcënuese mes dy vendeve.

Ndërkohë, presidenti amerikan Donald Trump paralajmëroi të mërkurën se një “armadë masive” po lëviz drejt Iranit dhe se “sulmi i ardhshëm” i Uashingtonit do të ishte “shumë më i keq” sesa bombardimet amerikane ndaj objekteve bërthamore dhe ushtarake iraniane të kryera qershorin e kaluar.

“Ashtu si me Venezuelën, Shtetet e Bashkuara janë të gatshme dhe të afta të përmbushin me shpejtësi misionin e tyre, me shpejtësi dhe dhunë, nëse është e nevojshme”, shkroi Trump në platformën e tij Truth Social.

Raportime të mediave amerikane tregojnë se situata po monitorohet nga afër në Shtëpinë e Bardhë.

CNN raportoi herët të enjten në mëngjes se Trump po shqyrton mundësinë e “një sulmi të ri të madh”, i cili mund të përfshijë goditje ndaj udhëheqësve iranianë, institucioneve qeveritare dhe centraleve bërthamore të vendit.

The Geo Post