Gjermania arreston një çift të martuar nën dyshimin për spiunazh për Kinën

Një çift i martuar gjerman është arrestuar me dyshimin për krijimin e kontakteve me shkencëtarë gjermanë për marrjen e informacioneve për teknologjitë me përdorim të mundshëm ushtarak për Kinën, kanë bërë të ditur të mërkurën (20.05.2026) prokurorët federalë, raporton Reuters.

Çifti, i identifikuar vetëm si Xuejun C. dhe Hua S. në përputhje me rregullat gjermane të privatësisë, dyshohet se punonin për një agjenci kineze të inteligjencës dhe se kërkonin informacione për teknologjinë e avancuar me aplikime ushtarake, kanë shtuar prokurorët.

Arrestimet, të cilat janë kryer të mërkurën, janë bërë derisa autoritetet gjermane paralajmërojnë për shqetësime në rritje të sigurisë nga Kina.

E shqetësuar për transferimin e teknologjisë, qeveria gjermane e kancelarit Friedrich Merz, i cili vizitoi Kinën në shkurt, po mundohet “ta zvogëlojë rrezikun” e lidhjeve ekonomike. Pekini ka mohuar vazhdimisht akuzat për spiunazh.

Në urdhërarrest, çifti akuzohet për krijimin e kontakteve me shkencëtarë në universitetet dhe institucionet kërkimore gjermane, duke përfshirë profesorë në inxhinieri hapësinore, shkencë kompjuterike dhe inteligjencë artificiale.

Ata dyshohen njashtu se herë pas here paraqiteshin si përkthyes, a punëtorë të një prodhuesi automobilash, kanë njoftuar prokurorët.

Disa shkencëtarë u joshën në Kinë për ligjërata me pagesë para një audience civile, kur në realitet, në to po merrnin pjesë përfaqësues të kompanive shtetërore të mbrojtjes, kanë shtuar prokurorët.

The GeoPost