Dronët ukrainasë detarë dhe ajrorë po dominojnë Detin e Zi

Dronët detarë ukrainas kanë sulmuar dhe dëmtuar dy cisterna të lidhura me të ashtuquajturën “flotë në hije” të Rusisë pranë hyrjes së portit të Novorossiysk, në një operacion që sinjalizon zgjerimin e fushatës së Kievit kundër kapaciteteve detare dhe energjetike ruse.

Sulmi ndodhi në orët e para të mëngjesit të së dielës, shumë pranë bregut, ku dy mjete detare pa pilot të tipit kamikazë “Magura”, të operuara nga forcat speciale ukrainase, u përplasën me pjesën e pasme të cisternave. Pamjet termike të publikuara nga Shtabi i Përgjithshëm i Ukrainës tregojnë momentet e afrimit dhe goditjes, pa ndonjë reagim të dukshëm mbrojtës nga anijet e shënjestruara.

Sipas një deklarate të përbashkët të Marinës së Ukrainës dhe Shërbimit të Sigurisë (SBU), të dyja anijet, të cilat konsiderohen transportuese të naftës ruse nën sanksione, janë përfshirë nga flakët dhe janë nxjerrë jashtë funksionit.

Presidenti ukrainas, Volodymyr Zelensky, e konfirmoi operacionin, duke theksuar se “këto cisterna janë përdorur në mënyrë aktive për transport të naftës dhe tani nuk do të përdoren më”. Ai paralajmëroi se Ukraina do të vazhdojë të rrisë kapacitetet e saj të goditjes me rreze të gjatë në det, ajër dhe tokë.

Ndërkohë, mediat shtetërore ruse nuk raportuan për incidentin, por agjenci të pavarura dhe blogerë ushtarakë rusë konfirmuan se sulmi ka ndodhur. Në një reagim në Telegram, ish-zyrtarë të sigurisë ruse e cilësuan operacionin si “akt terrorist ndaj objektivave civilë”.

Identiteti i saktë i cisternave të goditura nuk është konfirmuar zyrtarisht. Megjithatë, analiza të burimeve të hapura kanë identifikuar disa anije të sanksionuara në zonë, përfshirë “Llevant”, “Logano”, “Waler” dhe “Orion A”. Të dhënat e gjurmimit sugjerojnë se disa prej tyre kanë shfaqur lëvizje të pazakonta, përfshirë sinjale të mundshme të manipuluara GPS.

Sulmi i fundit vjen pas një serie operacionesh të intensifikuara ukrainase kundër infrastrukturës detare ruse. Gjatë muajit prill, dronët ukrainas goditën disa herë bazën detare në Sevastopol, duke dëmtuar anije luftarake dhe objekte ushtarake. Paralelisht, sulme ajrore me rreze të gjatë goditën rafinerinë e naftës në Tuapse, duke shkaktuar ndërprerje të prodhimit për javë të tëra.

Po ashtu, më 29 prill, një tjetër cisternë e dyshuar si pjesë e flotës në hije, “Marquise”, u godit në Detin e Zi dhe u la jashtë funksionit pranë brigjeve turke.

Përleshje detare u raportuan edhe në Ngushticën e Kerçit, ku dronët ukrainas sulmuan anije patrulluese ruse të lidhura me shërbimin e sigurisë FSB dhe Marinën ruse. Sipas deklaratave ukrainase, të paktën një ushtar rus u vra dhe disa të tjerë u plagosën.

Sipas të dhënave të publikuara nga ushtria ukrainase, vetëm gjatë muajit prill janë shkatërruar ose dëmtuar dhjetëra sisteme të mbrojtjes ajrore ruse, përfshirë elementë të sistemit S-400. Këto operacione janë pjesë e një strategjie më të gjerë për të dobësuar mbrojtjen ajrore dhe detare të Rusisë në rajon.

Që nga fillimi i pushtimit të plotë në vitin 2022, Flota ruse e Detit të Zi ka pësuar humbje të konsiderueshme, duke humbur një pjesë të madhe të kapaciteteve të saj luftarake dhe duke u tërhequr nga baza kryesore në Sevastopol drejt Novorossiysk.

Sulmi i së dielës ndodhi më pak se 10 kilometra nga pozicionet aktuale të anijeve luftarake ruse, të cilat, sipas raportimeve, nuk reaguan gjatë operacionit ukrainas.

Në një zhvillim paralel, Ukraina ka zgjeruar operacionet edhe jashtë Detit të Zi. Sipas zyrtarëve ukrainas, një dron me rreze të gjatë ka goditur një anije luftarake ruse në Detin Baltik, duke dëmtuar një korvetë raketash të tipit “Karakurt” në portin e Primorskut.

Analistët vlerësojnë se këto sulme tregojnë një ndryshim të rëndësishëm në strategjinë ukrainase, e cila tashmë synon jo vetëm objektivat ushtarake tradicionale, por edhe rrjetet logjistike dhe ekonomike që mbështesin luftën ruse.

Operacionet e fundit konfirmojnë gjithashtu rritjen e rolit të dronëve detarë në konflikt, duke i dhënë Ukrainës një avantazh asimetrik ndaj një force detare tradicionalisht më të fuqishme.

The Geopost