Vuçiq akuzon SHBA-në dhe Turqinë se po e armatosin Kosovën

Presidenti i Serbisë, Aleksandar Vuçiq, ka deklaruar se Shtetet e Bashkuara të Amerikës dhe Turqia janë të përfshira drejtpërdrejt në armatosjen e shqiptarëve në Kosovë, duke pretenduar se qëllimi i tyre është kërcënimi i Serbisë dhe popullsisë serbe.

“Amerikanët po i armatosin shqiptarët në Kosovë, ashtu si edhe Turqia. Qëllimi është sulm ndaj Serbisë dhe popullsisë serbe,” deklaroi Vuçiq gjatë një fjalimi para ambasadorëve të huaj.

Ai po ashtu akuzoi Shqipërinë, Kroacinë dhe Kosovën se po krijojnë një “aleancë ushtarake” kundër Serbisë, duke vënë në pikëpyetje të drejtën e këtyre shteteve për bashkëpunim në fushën e sigurisë dhe mbrojtjes.

Sipas Vuçiqit, këto marrëveshje po zgjerohen edhe me Slloveninë, ndërsa po bëhen përpjekje për përfshirjen e Bullgarisë.

Sipas të dhënave të Institutit Ndërkombëtar për Kërkime mbi Paqen në Stokholm (SIPRI), Serbia vetëm gjatë vitit 2024 ka shpenzuar rreth 2.2 miliardë dollarë për ushtrinë, që përbëjnë 2.6 për qind të Prodhimit të Brendshëm Bruto, duke e bërë atë shtetin me shpenzimet më të larta ushtarake në Ballkanin Perëndimor.

Ndërkohë, faktet në terren tregojnë se incidentet më serioze të armatosura në rajon lidhen me veprimet e strukturave serbe ndaj Kosovës.

Incidenti më i rëndë ndodhi në shtator të vitit 2023 në fshatin Banjskë, në veri të Kosovës, kur një grup i serbëve të armatosur sulmoi Policinë e Kosovës, duke vrarë një rreshter policor. Tre nga sulmuesit u vranë gjatë përleshjes.

Përgjegjësinë për sulmin e mori politikani dhe biznesmeni serb nga Kosova, Milan Radoiçiq, i cili ndodhet në Serbi dhe nuk është ndjekur penalisht deri më sot.

Po ashtu, Prokuroria Speciale e Kosovës ka ngritur aktakuzë ndaj Jovan Viqentijeviq, Dragisha Viqentijeviq dhe Igor Dimoviq për sulmin terrorist ndaj kanalit të Ibër-Lepencit.

Sipas aktakuzës, vëllezërit Viqentijeviq kanë vendosur eksploziv në kanal, duke shkaktuar dëme serioze.

Hetimet janë zhvilluar në bashkëpunim me FBI-në amerikane, ku analiza forenzike e dheut të gjetur në çizmet e të dyshuarve dhe ajo pranë vendit të shpërthimit ka vërtetuar praninë e tyre në vendin e ngjarjes.

Prokuroria Speciale thekson se provat dëshmojnë qartë se të pandehurit kanë kryer akt terrorist./TheGeoPost.

Serbian President Aleksandar Vučić:

Americans are openly and unambiguously arming Albanians in Kosovo and Metohija. Türkiye is also involved, delivering heavy weapons and everything else.

There is one single goal: directly threatening the Republic of Serbia and its territorial… pic.twitter.com/0TvfcoCZOe

— Clash Report (@clashreport) December 26, 2025