SHBA i zgjat edhe për 30 ditë licencën e operimit NIS-it, vazhdojnë negociatat për shitjen e aksioneve ruse

Zyra Amerikane për Kontrollin e Aseteve të Huaja (OFAC) ka zgjatur edhe për 30 ditë licencën e operimit për Industrinë e Naftës së Serbisë (NIS), kompani e cila ndodhet nën sanksione amerikane për shkak të pronësisë së saj me shumicë ruse.

Lajmin e bëri të ditur ministrja serbe e Energjisë, Dubravka Đedović Handanović, e cila tha se licenca është zgjatur deri më 31 korrik, duke i mundësuar NIS-it të vazhdojë aktivitetin e saj.

Sipas saj, vendimi i OFAC-it siguron vazhdimin e punës së Rafinerisë së Pançevës, e cila do të vazhdojë përpunimin e naftës bruto, një zhvillim që ajo e cilësoi si të rëndësishëm në kushtet e krizës globale energjetike.

Javën e kaluar, NIS kishte kërkuar nga autoritetet amerikane një zgjatje të re të licencës, me qëllim që të vazhdonte furnizimin e tregut serb me derivate të naftës.

OFAC e kishte shtyrë më herët licencën e operimit më 16 qershor, duke zgjatur njëkohësisht edhe lejen për negociatat lidhur me shitjen e aksioneve ruse në NIS te kompania hungareze MOL. Të dyja licencat ishin paraparë të skadonin më 1 korrik.

Administrata amerikane vendosi sanksione ndaj NIS në fillim të vitit 2025, me arsyetimin se synonte të pengonte Rusinë të siguronte të ardhura nga sektori energjetik për financimin e luftës në Ukrainë.

Për më shumë se një vit, Uashingtoni ka shtyrë vazhdimisht zbatimin e plotë të sanksioneve, ndërsa licenca e operimit është rinovuar periodikisht, sidomos pas interesimit të kompanisë hungareze MOL për blerjen e aksioneve ruse në NIS.

Negociatat për shitjen e aksioneve të Gazpromneft në rafinerinë e vetme të naftës në Serbi janë ende në zhvillim. Aktualisht, pronarët rusë kontrollojnë 56.15 për qind të aksioneve të NIS-it, ndërsa 44.85 për qind i përkasin kompanisë shtetërore ruse Gazpromneft.

Më 16 qershor, Qeveria e Serbisë dhe MOL nënshkruan një Marrëveshje Aksionarësh, e cila përcakton strukturën e ardhshme të menaxhimit dhe objektivat strategjike të kompanisë. Megjithatë, marrëveshja do të hyjë në fuqi vetëm nëse Gazpromneft dhe MOL arrijnë marrëveshje për shitjen e aksioneve dhe transaksioni miratohet nga OFAC.

The GeoPost