Mali i Zi vazhdon me kinezët: 693.9 milionë euro për ndërtimin e pjesës së dytë të autostradës Bar–Boljare

Kompania shtetërore malazeze Monteput ka përzgjedhur konsorciumin kinez Powerchina – Stecol – PCCD si fitues të tenderit për ndërtimin e seksionit të dytë të autostradës Bar–Boljare, në segmentin Matesevo–Andrijevica.

Oferta e këtij konsorciumi, në vlerë 693.9 milionë euro, u vlerësua si më e favorshmja në procesin e tenderimit.

Në garë morën pjesë edhe konsorciumi Cengiz–Azvirt, me ofertë prej 735 milionë eurosh, si dhe kompania China Communications Construction Company Limited, e cila ofroi 724.6 milionë euro.

Nga Monteput bënë të ditur se vendimi për zgjedhjen e kontraktorit është marrë pas hapjes së ofertave financiare, në kuadër të tenderit për projektimin dhe realizimin e punimeve. Pas nënshkrimit të kontratës, kontraktori do të nisë menjëherë punimet përgatitore dhe fazën e projektimit.

Autostrada Bar–Boljare synon të lidhë portin e Barit në Adriatik me kufirin e Malit të Zi me Serbinë, duke u konsideruar një nga projektet më të rëndësishme infrastrukturore në vend.

Seksioni Matesevo–Andrijevica financohet me një kredi prej 200 milionë eurosh nga Banka Evropiane për Rindërtim dhe Zhvillim (BERZH), si dhe me 150 milionë euro grante nga Bashkimi Evropian.

Procedura e tenderimit është zhvilluar sipas standardeve të BERZH-it, ndërsa ofertat teknike janë hapur më 31 tetor 2025.

Mali i Zi ende mban një barrë të konsiderueshme borxhi nga ndërtimi i pjesës së parë të autostradës, duke i detyruar 655 milionë euro bankës kineze Exim për seksionin Podgoricë–Matesevo, i cili u hap për qarkullim në verën e vitit 2022.

Aktualisht, autostrada përfundon në zonë malore, gjë që ka kufizuar efektet e saj ekonomike dhe logjistike.

Gjysma e trasës ura dhe tunele

Seksioni i ri Matesevo–Andrijevica, me gjatësi rreth 22 kilometra, do të karakterizohet nga vepra të ndërlikuara inxhinierike.

Sipas dokumentacionit të projektit, 3.9 kilometra do të jenë tunele, 7.1 kilometra ura, ndërsa pjesa tjetër trasë e hapur.

Ekspertët vlerësojnë se terreni i vështirë dhe kompleksiteti i punimeve do të kërkojnë investime të mëdha dhe zbatim të saktë teknik, ndërsa mbetet e hapur çështja e afateve të përfundimit.

Qeveria e Malit të Zi ka deklaruar ambicien që deri në fund të dekadës të përshpejtojë ndërtimin e korridoreve kryesore rrugore, por realizimi i këtij synimi do të varet nga financimi dhe menaxhimi paralel i projektimit, shpronësimeve dhe procedurave të tenderimit.

The GeoPost