Kush janë dy serbët e arrestuar nën dyshimin për krime lufte në Kosovë?

Policia e Kosovës ka arrestuar dy persona të dyshuar për përfshirje në krime lufte kundër popullatës civile gjatë luftës në Kosovë.

Bëhet e ditur se të arrestuarit janë Momir Jakshiq, 80 vjeç, dhe Miljko Bishevaq, 65 vjeç.

Rasti lidhet me ngjarjet e 19 prillit 1999, kur një grup civilësh shqiptarë të paarmatosur, të cilët po udhëtonin drejt Malit të Zi, dyshohet se u ndaluan në zonën e njohur si Kalludra e Vogël, në komunën e Zubin Potokut.

Sipas hetimeve të zhvilluara nga Drejtoria për Hetimin e Krimeve të Luftës, civilët dyshohet se fillimisht u grabitën dhe iu morën paratë dhe sendet me vlerë. Më pas, 23 prej tyre dyshohet se u ekzekutuan, ndërsa trupat e tyre u varrosën në një lokacion pranë lumit në Kalludrën e Vogël.

Zhvillimi i fundit në këtë rast ka ndodhur më 27 korrik 2026, kur hetuesit nga Sektori për Hetimin e Personave të Zhdukur nga Lufta kanë identifikuar një lokacion ku dyshohet se ndodhet një varr masiv.

Gjatë ekzaminimeve në terren janë gjetur mbetje njerëzore, përfshirë pjesë kafkash dhe fragmente të tjera skeletore, si dhe pjesë të veshjeve që dyshohet se u përkasin viktimave.

Bazuar në provat e mbledhura dhe dëshmitë e siguruara gjatë hetimit, autoritetet dyshohet se kanë identifikuar Momir Jakshiqin, ish-anëtar i Mbrojtjes Territoriale, dhe Miljko Bishevaqin, ish-komandant të Mbrojtjes Territoriale të Komunës së Zubin Potokut, si persona të dyshuar për përfshirje në ndalimin, grabitjen, vrasjen dhe varrosjen e 23 civilëve shqiptarë.

Lokacioni ku dyshohet se ndodhet varri masiv është aktualisht nën mbrojtjen e Njësisë së Reagimit të Shpejtë.

Në koordinim me Prokurorinë Speciale të Republikës së Kosovës dhe Institutin e Mjekësisë Ligjore, pritet të zhvillohen gërmime dhe ekzaminime të mëtejshme mjeko-ligjore, me qëllim të dokumentimit të plotë të rastit dhe identifikimit të viktimave.

Me urdhër të Prokurorisë Speciale, Jakshiq dhe Bishevac janë ndaluar për 48 orë, nën dyshimin për kryerjen e veprës penale “Krime lufte kundër popullsisë civile”.

The GeoPost