Kongresisti Wilson: Serbia të ndalë kërcënimet ndaj Kosovës dhe të shkëputet nga Moska

Kongresisti amerikan Joe Wilson ka bërë thirrje që Serbia të ndërpresë varësinë nga energjia ruse, të distancohet nga Rusia, Kina dhe Irani dhe të harmonizojë plotësisht politikën e saj me institucionet perëndimore, nëse dëshiron të bëhet pjesë e Bashkimit Evropian dhe NATO-s.

Në një intervistë për Shërbimin e Ballkanit të Radios Evropa e Lirë, Wilson rikonfirmoi mbështetjen e tij për pavarësinë e Kosovës, ndërsa kritikoi ashpër Beogradin për lidhjet me Moskën dhe për atë që e cilësoi si kërcënime të vazhdueshme ndaj Kosovës.

Sipas tij, Serbia vazhdon të jetë nën ndikimin e madh të presidentit rus Vladimir Putin, duke përmendur faktin se ende importon naftë dhe gaz nga Rusia, ndërsa kompania shtetërore serbe e naftës NIS është në pronësi të kompanisë ruse Gazprom Neft.

“Për fat të keq, Serbia vazhdon të blejë naftë dhe gaz nga Putini. Po ashtu, ekziston një ndikim i madh i Partisë Komuniste Kineze në sektorë strategjikë, ndërsa lidhjet me regjimin iranian janë të papranueshme. Serbia duhet të jetë pjesë e botës perëndimore dhe jo e diktaturave”, tha Wilson.

Ai shtoi se Serbia duhet të ndjekë shembullin e vendeve të tjera të rajonit, të cilat sipas tij kanë bërë hapa të rëndësishëm drejt integrimit euroatlantik.

“Kam vizituar Slloveninë dhe Kosovën dhe kam parë përparimin e tyre. Shpresoj që edhe Mali i Zi, Maqedonia e Veriut dhe Serbia të ecin në të njëjtën rrugë. Pavarësia e Kosovës është shumë e rëndësishme dhe kërcënimet që vijnë nga Serbia nuk kanë vend në shekullin XXI”, u shpreh ai.

Kritika për politikën energjetike të Serbisë

Wilson tha se negociatat që Serbia po zhvillon për të reduktuar varësinë nga nafta ruse nuk janë të mjaftueshme dhe se Beogradi duhet të ndërmarrë hapa të menjëhershëm.

“Negociatat nuk mjaftojnë. Serbia nuk ka nevojë të presë askënd. Ajo duhet të ndërpresë menjëherë blerjen e energjisë nga Rusia, sepse kjo është mënyra për të mos financuar luftën e Putinit në Ukrainë”, deklaroi ai.

Sipas kongresistit amerikan, kjo nuk është vetëm çështje serbe, por pjesë e një përpjekjeje globale për të izoluar Rusinë ekonomikisht.

Kërkon zhvendosjen e Asamblesë Parlamentare të OSBE-së nga Beogradi

Wilson foli edhe për rezolutën që ka sponsorizuar në Kongresin amerikan, përmes së cilës kërkohet që Sesioni Vjetor i Asamblesë Parlamentare të OSBE-së në vitin 2027 të mbahet në Çarlston të Karolinës së Jugut dhe jo në Beograd.

Ai tha se objektivi kryesor është organizimi i sesionit në Shtetet e Bashkuara, por shtoi se shqetësimet për zgjedhjen e Beogradit lidhen me orientimin e politikës së jashtme të Serbisë.

“Kjo nuk është një çështje kundër Serbisë, por një çështje në favor të mbajtjes së sesionit në SHBA. Megjithatë, jam i shqetësuar për ndikimin rus, kinez dhe iranian në Serbi”, tha Wilson.

Asambleja Parlamentare e OSBE-së ka bërë të ditur se delegacioni amerikan kishte njoftuar më herët se Çarlstoni nuk mund ta organizonte sesionin e vitit 2027, çka bëri që Beogradi të zgjidhej sipas procedurave të organizatës.

Megjithatë, Wilson tha se problemet logjistike që kishin penguar organizimin në SHBA tashmë janë zgjidhur dhe se Çarlstoni është plotësisht i gatshëm ta presë këtë aktivitet ndërkombëtar.

Ai shtoi se, nëse sesioni i vitit 2027 mbahet në SHBA, Beogradi mund të jetë nikoqir i Asamblesë Parlamentare të OSBE-së një vit më vonë, në vitin 2028.

“Serbia duhet të zgjedhë anën e historisë”

Në fund të intervistës, Wilson tha se e ardhmja e Serbisë është në Bashkimin Evropian dhe NATO, por vetëm nëse vendi shkëputet nga ndikimi i Rusisë, Kinës dhe Iranit.

“Populli i Serbisë duhet të vendosë për të ardhmen e vet në mënyrë të lirë dhe demokratike. Unë dua që Serbia të jetë në anën fituese të historisë, në anën e lirisë dhe demokracisë, e jo të totalitarizmit”, deklaroi kongresisti amerikan.

Ai ritheksoi mbështetjen e tij për Kosovën, duke vlerësuar se pavarësia e saj është një realitet që duhet respektuar dhe se stabiliteti në Ballkan kërkon heqjen dorë nga politikat konfrontuese dhe afrimin me institucionet euroatlantike.

The GeoPost