“Krimi në “Panda” nuk u krye nga shqiptarët”, familjet kujtojnë deklaratat e Vuçiqit dhe kërkojnë zbardhjen e rastit

Vrasja e gjashtë të rinjve serbë në kafenenë “Panda” në Pejë, më 14 dhjetor 1998, është rikthyer në qendër të vëmendjes pas pretendimeve të reja për autorët e dyshuar të krimit.

Megjithatë, familjarët e viktimave thonë se nuk u besojnë më spekulimeve dhe kërkojnë vetëm prova zyrtare nga organet e drejtësisë.

Avokati i familjeve të viktimave, Ivan Niniq, i ka dorëzuar Prokurorisë Publike për Krimin e Organizuar në Serbi një kërkesë për marrjen në pyetje të Radomir Boban Baçeviq, pasi emri i tij u përmend nga Milosh Medenica – një i dënuar në arrati nga Mali i Zi – si autor i drejtpërdrejtë i të shtënave në kafenenë “Panda”.

Zvonko Gvozdenoviq, babai i Vukota Gvozdenoviq, i cili u vra në moshën 16-vjeçare, deklaroi për portalin Nova, se familjet nuk duan më të dëgjojnë pretendime të pabazuara.

“Nuk e di nëse Medenica po thotë të vërtetën apo jo. Dikush nga Prokuroria duhet ta hetojë këtë dhe të përcaktojë nëse ka ndonjë bazë në këto pretendime. Fatkeqësisht, kjo nuk është hera e parë që dikush përdor vdekjen e fëmijëve tanë”, tha ai.

Sipas Gvozdenoviq, gjatë viteve janë përmendur shumë emra si autorë të mundshëm të masakrës, por asnjëherë nuk janë paraqitur prova që do të çonin në zbardhjen e rastit.

“Ne duam vetëm prova dhe emrat e atyre që qëlluan, si dhe të atyre që urdhëruan krimin. Jo emra që qarkullojnë nëpër thashetheme, por emra që do të konfirmohen nga Prokuroria”, u shpreh ai.

Ai kritikoi edhe institucionet serbe për mungesën e progresit në hetime, duke theksuar se kanë kaluar më shumë se një dekadë pa rezultate konkrete.

Masakra në kafenenë “Panda”

Më 14 dhjetor 1998, persona të armatosur hapën zjarr me armë automatike në kafenenë “Panda” në Pejë, ku ishin mbledhur të rinj serbë.

Në sulm u vranë Ivan Obradoviq (15), Vukota Gvozdenoviq (16), Zoran Stanojeviq, Svetislav Ristiq (17), Dragan Trifunoviq (17) dhe Ivan Radevićq (25).

Po ashtu, Vladimir Lonçareviq dhe pronari i lokalit, Mirsad Shaboviq, u plagosën rëndë, ndërsa Nikola Rajoviq pësoi lëndime të lehta.

Deklaratat e Vuçiqit

Rasti “Panda” ka qenë objekt debatesh edhe për shkak të deklaratave të presidentit serb, Aleksandar Vuçiq.

Në dhjetor të vitit 2013, kur ishte zëvendëskryeministër i Serbisë, ai deklaroi se “krimi në ‘Panda’ nuk u krye nga shqiptarët” dhe se opinioni publik do të “tronditej” kur të mësonte të vërtetën.

Dy vjet më vonë, në fund të vitit 2015, Vuçiq tha se ishte “pothuajse i sigurt” për atë që kishte ndodhur në kafenenë “Panda”, por deri më sot autorët e këtij krimi nuk janë identifikuar zyrtarisht dhe rasti mbetet i pazbardhur.

The GeoPost