Janjiq: Dënimi i Radoiçiqit mund të hapë edhe rastin e vrasjes së Oliver Ivanoviqit

Analisti politik Dushan Janjiq vlerëson se një proces gjyqësor ndaj Milan Radoiçiqit për sulmin e armatosur në Banjskë mund të ketë pasoja më të gjera për drejtësinë në rajon.

Sipas tij, ngritja e një aktakuze dhe dënimi eventual i Radoiçiqit nuk do të kufizohej vetëm në këtë rast, por do të mund të hapte edhe çështje të tjera të pazbardhura.

“Dënimi i tij mund të hapte edhe raste të tjera, përfshirë zbardhjen e vrasjes së politikanit kosovar Oliver Ivanoviq në vitin 2018”, ka deklaruar Janjiq.

Radoiçiq dhe Vesellinoviq përmenden në aktakuzë si “udhëheqës të një grupi kriminal” që ka planifikuar vrasjen e Ivanoviqit.

Ndaj tyre nuk është ngritur aktakuzë, pasi janë në arrati.

Në Serbi, rasti për vrasjen e Oliver Ivanoviqit vazhdon të jetë në fazën e hetimeve paraprake.

Janjiq sugjeron se hetimi i plotë i ngjarjeve në Banjskë dhe përgjegjësia penale për organizatorët mund të krijonin hapësirë për rihapjen dhe thellimin e hetimeve edhe në raste të tjera të ndjeshme. /REL