Hulumtimi i IRI: Serbët favorizojnë marrëdhënie më të ngushta me Rusinë, pasuar nga Kina

Një hulumtim i opinionit publik i realizuar nga Instituti Ndërkombëtar Republikan (IRI) me seli në Uashington tregon se shumica e qytetarëve të Serbisë e konsiderojnë Rusinë partnerin më të rëndësishëm ndërkombëtar të vendit.

Sipas rezultateve të anketës, 43 për qind e të anketuarve u shprehën se Serbia duhet të mbajë marrëdhëniet më të forta me Rusinë, ndërsa vetëm 4 për qind thanë se nuk e mbështesin një qasje të tillë.
Në vendin e dytë renditen Kina dhe Bashkimi Evropian, me nga 39 për qind të qytetarëve që vlerësojnë se Serbia duhet të zhvillojë marrëdhënie të ngushta me secilën prej tyre. Kundër forcimit të marrëdhënieve me Kinën u deklaruan 5 për qind e të anketuarve, ndërsa 4 për qind ishin kundër thellimit të marrëdhënieve me Bashkimin Evropian.

Shtetet e Bashkuara të Amerikës renditen të fundit ndër aktorët kryesorë ndërkombëtarë të përfshirë në anketë. Vetëm 29 për qind e qytetarëve thanë se Serbia duhet të mbajë marrëdhënie të forta me SHBA-në, ndërsa 6 për qind u shprehën se kjo nuk është e rëndësishme.

Rezultatet pasqyrojnë vazhdimësinë e perceptimit pozitiv ndaj Rusisë në opinionin publik serb. Marrëdhëniet ndërmjet Beogradit dhe Moskës janë karakterizuar prej vitesh nga lidhje të ngushta politike, ekonomike, energjetike dhe kulturore, ndërsa Rusia mbetet një nga aleatët kryesorë të Serbisë në arenën ndërkombëtare, veçanërisht për mbështetjen që i jep Beogradit në kundërshtimin e pavarësisë së Kosovës në forumet ndërkombëtare.

Që nga fillimi i agresionit rus ndaj Ukrainës në shkurt të vitit 2022, Serbia ka dënuar në OKB shkeljen e integritetit territorial të Ukrainës, por, ndryshe nga vendet anëtare të Bashkimit Evropian dhe shumica e vendeve kandidate, nuk është bashkuar me sanksionet e BE-së kundër Rusisë. Beogradi ka argumentuar se ruajtja e marrëdhënieve me Moskën lidhet me interesat e tij kombëtare, përfshirë varësinë energjetike dhe çështjen e Kosovës.

Në të njëjtën kohë, Serbia vazhdon të deklarojë se anëtarësimi në Bashkimin Evropian mbetet objektivi i saj strategjik. Megjithatë, progresi në procesin e integrimit është shoqëruar me kritika të vazhdueshme nga Brukseli për mospërputhjen e politikës së jashtme të Serbisë me atë të BE-së, veçanërisht sa i përket sanksioneve ndaj Rusisë dhe harmonizimit me Politikën e Përbashkët të Jashtme dhe të Sigurisë.

Anketa trajtoi edhe qëndrimet e qytetarëve ndaj integrimit evropian. Nëse do të mbahej një referendum për anëtarësimin e Serbisë në Bashkimin Evropian, 46 për qind e të anketuarve deklaruan se do të votonin “pro”, ndërsa 29 për qind thanë se do të votonin “kundër”. Pjesa tjetër u shpreh se nuk e dinte se si do të votonte ose se nuk do të merrte pjesë në referendum.

Hulumtimi është realizuar gjatë muajve maj dhe qershor, duke përdorur një metodologji të kombinuar: 75 për qind e të anketuarve u intervistuan me telefon, ndërsa 25 për qind përmes internetit.
Gjetjet e sondazhit pasqyrojnë një opinion publik ku Rusia vazhdon të gëzojë mbështetje të konsiderueshme, ndërsa një pjesë e madhe e qytetarëve mbështesin edhe anëtarësimin në Bashkimin Evropian. Kjo reflekton balancimin që Serbia përpiqet të ruajë në politikën e saj të jashtme, mes lidhjeve tradicionale me Rusinë dhe aspiratës së deklaruar për integrim evropian./TheGeopost