BE-ja kërkon distancim nga Moska, Vuçiq i premton Putinit më shumë bashkëpunim

Pavarësisht deklarimeve të vazhdueshme për rrugën evropiane të Serbisë, Aleksandar Vuçiq po vazhdon të theksojë marrëdhëniet e ngushta të Beogradit me Moskën.

Vuçiq, kreu i listës së Partisë Progresive Serbe “Serbia e Bashkuar”, e ka uruar presidentin rus Vladimir Putin për ditëlindje, duke e falënderuar për mbështetjen që Rusia i ofron Serbisë.

“Vlerësoj fjalët mbështetëse që më drejtuat së fundmi personalisht, por edhe mbështetjen që Federata Ruse i ofron Republikës së Serbisë dhe interesave të saj në organizatat ndërkombëtare”, tha Vuçiq në mesazhin e urimit, të publikuar në Instagram.

Ai tha se është i bindur se bashkëpunimi mes dy vendeve do të vazhdojë të thellohet.

“Jam i bindur se në të ardhmen do të vazhdojmë të forcojmë marrëdhëniet midis Serbisë dhe Rusisë, bazuar në respektin e ndërsjellë, mirëkuptimin dhe miqësinë tradicionale të popujve tanë”, thuhet në mesazhin e tij.

Urimi vjen vetëm disa ditë pasi Putin deklaroi se shpreson që Vuçiq të bëhet kryeministri i ardhshëm i Serbisë.

Putin tha gjithashtu se Rusia e vlerëson politikën e Vuçiqit dhe dëshirën e tij për të ruajtur bashkëpunimin me Moskën.

Vetë Vuçiq, gjatë fushatës zgjedhore, ka theksuar vazhdimisht se Serbia është i vetmi vend në Evropë që, sipas tij, “i ka rezistuar presionit” për vendosjen e sanksioneve ndaj Rusisë.

Serbia është një nga vendet e pakta evropiane që nuk iu bashkua sanksioneve të BE-së kundër Moskës pas pushtimit rus të Ukrainës.

Beogradi ka vazhduar ndërkohë bashkëpunimin me Rusinë, përfshirë në fushën energjetike dhe atë politike, pavarësisht presionit të Bashkimit Evropian dhe Shteteve të Bashkuara.

Serbia është kandidate për anëtarësim në Bashkimin Evropian, por Brukseli ka kërkuar vazhdimisht që Beogradi të përafrojë politikën e tij të jashtme me atë të BE-së, përfshirë vendosjen e sanksioneve ndaj Rusisë.

Mosvendosja e sanksioneve është një prej çështjeve që ka ndikuar në marrëdhëniet e Serbisë me BE-në dhe në procesin e saj të integrimit evropian.

Në të njëjtën kohë, autoritetet serbe vazhdojnë ta konsiderojnë Moskën një aleat të rëndësishëm, veçanërisht për shkak të mbështetjes ruse në organizatat ndërkombëtare për çështjen e Kosovës.

Rusia nuk e njeh pavarësinë e Kosovës dhe përdor të drejtën e vetos në Këshillin e Sigurimit të OKB-së, çka i jep Moskës rol të rëndësishëm në këtë çështje.

Beogradi mbështetet gjithashtu në qëndrimin e Moskës për çështje të tjera të ndjeshme për Serbinë, përfshirë refuzimin e cilësimit të masakrës së Srebrenicës të vitit 1995 si gjenocid.

Në këtë mënyrë, ndërsa Serbia vazhdon të deklarojë synimin për anëtarësim në Bashkimin Evropian, Vuçiq po përsërit publikisht zotimin për forcimin e marrëdhënieve me Rusinë dhe po e paraqet mbështetjen e Moskës si të rëndësishme për interesat e Beogradit.

The GeoPost