Dezinformim në Instagram: Pamjet nga Prishtina u paraqitën në mënyrë të rreme si lëvizje drejt Mitrovicës së Veriu

Faqja në Instagram “srpski.inat_kim”, e cila ka mbi 40.000 ndjekës, publikoi një video shqetësuese të shoqëruar me pretendimin e rremë se “shqiptarët janë nisur drejt Mitrovicës së Veriut”.

Publikimi në një kohë të shkurtër mblodhi mbi 80.000 dhe shkaktoi përhapje të panikut. Megjithatë, pas verifikimit të detajuar u konstatua se bëhet fjalë për dezinformim dhe nxjerrje nga konteksti.

Analiza dhe demantimi

Pamjet nuk paraqesin asnjë lëvizje apo sulm drejt Mitrovicës së Veriut, por grumbullimin dhe protestat e qytetarëve në Prishtinë, të cilat pasuan pas shpalljes së aktgjykimit ndaj themeluesve dhe pjesëtarëve të UÇK-së në Hagë.

Pamjet janë realizuar në rrugët e Prishtinës gjatë një kolone protestuese me automjete dhe tubimit të qytetarëve, të cilët shprehën pakënaqësinë e tyre ndaj aktgjykimit gjyqësor.

Dhomat e Specializuara më 16 shtator 2026 shpallën aktgjykimet e shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit.

Po atë ditë, në Prishtinë u mbajtën tubime masive dhe protesta të qytetarëve. Fotografitë dhe raportimet nga terreni tregojnë tubime në sheshin “Skënderbeu”, para Qeverisë së Kosovës dhe objektit të EULEX-it, si dhe praninë e forcave policore. Gjatë protestave u shënuan edhe incidente të veçanta.

Pra, problemi kryesor i publikimit të kontestuar nuk qëndron vetëm në faktin se pamjeve u është dhënë një përshkrim i pasaktë, por në atë se pamjet ekzistuese të një ngjarjeje reale në Prishtinë janë paraqitur si pamje të gjoja lëvizjes së popullsisë drejt Mitrovicës së Veriut.

Zëvendësdrejtori i Policisë së Kosovës për rajonin e Veriut, Veton Elshani, më 16 shtator tha se situata në katër komunat me shumicë serbe në veri është e qetë dhe se nuk ka indikacione për rrezik të sigurisë.

/The Geopost/