Aeroplanët luftarakë të NATO-s rrëzojnë një dron mbi Letoni

Avionët luftarakë të misionit të NATO-s për patrullimin ajror në rajonin baltik rrëzuan një dron që hyri në hapësirën ajrore të Letonisë gjatë natës, njoftuan forcat e armatosura të vendit në platformën X.

Droni u rrëzua pranë fshatit Rugāji në verilindje të Letonisë, afër kufirit me Rusinë, pasi u aktivizuan me urgjencë avionët italianë “Eurofighter” të stacionuar në Lituani dhe ata turq F-16 të stacionuar në Estoni, raporton Politico.

Mjeti ajror pa pilot u shfaq në hapësirën ajrore letoneze “si pasojë e luftës elektronike ruse”, deklaruan Forcat e Armatosura Kombëtare të Letonisë në një njoftim për shtyp.

Më herët të premten, më shumë se 50 dronë ukrainas sulmuan objektiva në rajonet perëndimore të Rusisë, përfshirë Leningradin dhe Tverin; ata goditën Ust-Luga-n — portin e dytë më të madh në Rusi — si dhe një magazinë që i përkiste gjigantit të tregtisë elektronike “Wildberries”.

Ushtria e Letonisë paralajmëroi se incidente të ngjashme mund të ndodhin sërish në të ardhmen.

“Për sa kohë që agresioni rus në Ukrainë vazhdon, është e mundur përsëritja e rasteve të tilla, kur një mjet fluturues i huaj pa pilot hyn ose i afrohet hapësirës ajrore letoneze”, thuhej në deklaratë.

Rreth orës 04:00 të mëngjesit (me orën lokale) u shpall alarmi për sulm ajror në katër bashki të Letonisë lindore.

Ushtria u bëri thirrje banorëve të qëndronin brenda dhe larg mureve të jashtme.

Pasi droni u rrëzua, Sandra Kapteine, drejtuese e administratës së fshatit Rugāji, i tha Agjencisë së Informacionit të Letonisë se incidenti “nuk shkaktoi viktima”, pasi mbetjet e dronit ranë në një “zonë të pyllëzuar”.

Gjatë muajve të fundit është vërejtur një shtim i incidenteve të ngjashme në vendet që ndodhen pranë zonës së luftës.

Një javë më parë, ministri bullgar i Mbrojtjes, Dimitar Stoyanov, deklaroi se një dron i prodhuar në Ukrainë kishte hyrë në hapësirën ajrore bullgare nga Rumania dhe kishte shpërthyer pranë fshatit Kardam.

The GeoPost