Pa koordinim me autoritet lokale, grup i armatosur nga Republika Srpska hyri në Federatën e Bosnje dhe Hercegovinës gjatë vizitës së Vuçiqit

Një grup prej rreth 30 personash të armatosur, të identifikuar si pjesëtarë të Ministrisë së Punëve të Brendshme të Republikës Srpska, thuhet se hyri në territorin e Federatës së Bosnje dhe Hercegovinës gjatë vizitës së presidentit serb Aleksandar Vuçiq, pa njoftuar institucionet kompetente të sigurisë, duke ngritur pikëpyetje serioze për respektimin e procedurave të sigurisë dhe rendit kushtetues të Bosnje dhe Hercegovinës.

Sipas portalit investigativ Istraga.ba, grupi u vu re në afërsi të Bugojnos, ku po qëndronte delegacioni i Republikës së Serbisë dhe i Republikës Srpska, i kryesuar nga presidenti serb Aleksandar Vuçiq dhe presidenti i Republikës Srpska, Millorad Dodik.

Sipas planit zyrtar të sigurisë, mbrojtja e delegacionit ishte paraparë të realizohej nga Drejtoria për Koordinimin e Trupave Policore të Bosnje dhe Hercegovinës, në bashkëpunim me Ministrinë e Punëve të Brendshme të Serbisë dhe strukturat policore lokale në zonat ku lëvizte delegacioni.
Megjithatë, grupi i armatosur i vërejtur në territorin e e Bosnjës Qendrore nuk figuronte në planin e miratuar të sigurimit.

Sipas Istraga.ba, personat lëviznin me katër furgonë të MPB-së së Republikës Srpska, dy automjete të kompanisë private EuroExpress dhe tre mjete të tipit ATV, ndërsa disa prej tyre nuk mbanin uniforma apo shenja identifikuese policore.

Policia ndërhyri në terren

Raportohet se pjesëtarët e Policisë së Bosnjës Qendrore e identifikuan grupin në një zonë pyjore brenda perimetrit të zgjeruar të sigurisë rreth delegacionit.

Kur policët kërkuan shpjegime për praninë e tyre, personat e armatosur thanë se ndodheshin “në zbulim”. Megjithatë, sipas burimeve të Istraga.ba, numri i tyre, pajisjet dhe automjetet nuk përputheshin me të dhënat zyrtare të personelit të autorizuar për sigurimin e vizitës.

Pas verifikimeve fillestare, në vendngjarje u dërgua Njësia Speciale e Policisë.

Sipas raportimit, grupi u largua nga zona pas mbërritjes së njësisë speciale dhe më vonë u pa duke lëvizur drejt Donji Vakufit, ndërsa në fund u urdhërua të largohej nga territori i Federates në drejtim të Kupresit.

Ministria e Punëve të Brendshme e Bosnjës Qendrore konfirmoi për Istraga.ba se incidenti është regjistruar, duke theksuar se gjatë ndërhyrjes nuk pati përdorim armësh dhe as përplasje mes forcave policore.
Implikime për sigurinë dhe rendin kushtetues
Rasti ka ngritur pikëpyetje mbi funksionimin e mekanizmave të koordinimit të sigurisë në Bosnje dhe Hercegovinë.

Sipas legjislacionit të Bosnje dhe Hercegovinës, strukturat policore të një entiteti nuk mund të kryejnë aktivitete operative në territorin e entitetit tjetër pa koordinim dhe autorizim paraprak nga institucionet kompetente.

Nëse pretendimet e publikuara nga Istraga.ba konfirmohen, rasti mund të përbëjë një shkelje të procedurave të sigurisë dhe të ngrejë shqetësime për funksionimin e koordinimit ndërinstitucional gjatë vizitave të nivelit të lartë.

Incidenti ndodhi gjatë vizitës së Aleksandar Vuçiqit në Bosnje dhe Hercegovinë, ku ai vizitoi edhe fshatin Çipuljiq pranë Bugojnos, vendlindjen e familjes së tij.
Deri në publikimin e këtij artikulli, Ministria e Punëve të Brendshme e Republikës Srpska nuk ka dalë me një deklaratë zyrtare për të sqaruar pretendimet lidhur me përbërjen e grupit, arsyen e pranisë së tij në territorin e Federatës së Bosnje dhe Hercegovinës apo nëse ai ishte pjesë e ndonjë operacioni të autorizuar.

Ky zhvillim vjen në një periudhë të tensionuar politike në Bosnje dhe Hercegovinë, ku veprimet e strukturave të sigurisë të Republikës Srpska dhe raportet ndërmjet institucioneve shtetërore dhe atyre të entitetit mbeten objekt i vëmendjes së vazhdueshme të aktorëve vendas dhe ndërkombëtarë.

/The Geopost/