SHBA planifikon të ndalojë importin e transmetuesve optikë kinezë për AI

Administrata e Trump po harton një ndalim për importet në SHBA të modeleve të reja të komponentëve të transmetuesve optikë kinezë për qendrat e të dhënave, thanë për Reuters katër persona të njohur me çështjen. Qëllimi është mbrojtja e infrastrukturës që mbështet zhvillimin e shpejtë të inteligjencës artificiale (AI).

Komisioni Federal i Komunikimeve (FCC), i cili mbikëqyr industrinë amerikane të telekomunikacionit, po punon për një masë që do të ndalojë importin e transmetuesve optikë (optical transceivers) të rinj kinezë. Këta pajisje mundësojnë që të dhënat të transmetohen përmes kabllove me fibër optike me shpejtësinë e dritës brenda qendrave të të dhënave. Zyrtarët shpresojnë ta publikojnë këtë masë brenda këtij viti, kohë kur edhe do të hyjë në fuqi.

Ky veprim, i cili nuk ishte raportuar më parë, synon të parandalojë kompanitë kineze nga vjedhja e të dhënave, instalimi i programeve keqdashëse (malware) ose ndërprerja e shërbimeve në qendrat amerikane të të dhënave, ku ndodhen çipat që përdoren për trajnimin dhe funksionimin e modeleve të inteligjencës artificiale.

Burimet theksuan se FCC-ja mund ta ndryshojë ose edhe ta tërheqë këtë kufizim, duke folur në kushte anonimiteti për shkak të ndjeshmërisë së çështjes. Megjithatë, kjo është shembulli më i fundit i përpjekjeve të administratës Trump për të kufizuar depërtimin e teknologjisë kineze në industritë amerikane të teknologjisë së avancuar, përpara se ajo të bëhet pjesë e zinxhirit të furnizimit.

“Transmetuesit optikë paraqesin padyshim rrezik,” tha Divyansh Kaushik, ekspert i politikave për inteligjencën artificiale në kompaninë këshilluese Beacon Global Strategies me seli në Uashington. “Ndërsa ndërtimi i qendrave të të dhënave po zgjerohet me ritme të shpejta, është e rëndësishme të sigurohet që zinxhiri i furnizimit për këto qendra të jetë i mbrojtur që në fillim,” shtoi ai.