Vuçiq përballet me mosbesim të lartë – 63% e qytetarëve besojnë se pushteti punon për interesa personale

Një anketë e publikuar nga Qendra e Beogradit për Politikë të Sigurisë (BCBP) tregon se qytetarët e Serbisë mbeten të ndarë sa i përket drejtimit në të cilin po ecën vendi dhe qëndrimit ndaj pushtetit të presidentit Aleksandar Vuçiq, ndërsa shumica beson se politikanët në pushtet veprojnë për interesa personale.

Sipas rezultateve të sondazhit, 44.1 për qind e të anketuarve vlerësojnë se Serbia po shkon në drejtim të mirë, prej tyre 32.9 për qind mendojnë se vendi është “kryesisht në drejtimin e duhur”, ndërsa 11.2 për qind se është “plotësisht në drejtimin e duhur”.

Nga ana tjetër, 50.4 për qind e qytetarëve besojnë se Serbia po ecën në drejtim të gabuar, ku 25.4 për qind thonë se është “kryesisht në drejtimin e gabuar”, ndërsa 25 për qind se është “plotësisht në drejtimin e gabuar”. Rreth 5.5 për qind nuk kanë dhënë përgjigje.

Grafiku shoqërues thekson gjithashtu se në Serbi ekziston një polarizim i theksuar ndërmjet brezave.

Sa i përket kënaqësisë me gjendjen aktuale, qytetarët shprehen më të kënaqur me situatën e sigurisë, e cila ka vlerësimin mesatar 2.78 në një shkallë nga 1 deri në 5.

Më pas renditen:

gjendja personale ekonomike – 2.81;
situata ekonomike në Serbi – 2.60;
drejtësia sociale – 2.44;
situata politike – 2.36, që është edhe fusha me vlerësimin më të ulët.

Sondazhi evidenton edhe një qëndrim kritik ndaj qeverisjes së presidentit Aleksandar Vuçiq.

Sipas rezultateve:

34.4 për qind deklarojnë se e kundërshtojnë plotësisht pushtetin aktual;
12.6 për qind e kundërshtojnë pjesërisht;
17.2 për qind e mbështesin plotësisht;
18.6 për qind e mbështesin pjesërisht;
15.7 për qind nuk mbajnë asnjërin qëndrim;
1.5 për qind nuk janë përgjigjur.

Një tjetër tregues i rëndësishëm i sondazhit lidhet me perceptimin për mënyrën se si qeveriset vendi.

Plot 63 për qind e të anketuarve besojnë se politikanët në pushtet, të organizuar në grupe interesi, e keqpërdorin pushtetin për përfitime personale, ndërsa vetëm 30 për qind mendojnë se ata punojnë në interes të qytetarëve dhe jo për interesat e tyre personale.

Rezultatet pasqyrojnë një shoqëri të ndarë politikisht, me nivel të ulët besimi ndaj institucioneve dhe me pakënaqësi të theksuar ndaj gjendjes politike në vend.

The GeoPost