Mali i Zi i kundërpërgjigjet Vuçiqit për ‘luftë hibride’: Akuzat e Serbisë intensifikohen sa herë që afrohemi drejt BE-së

Ministria e Punëve të Jashtme e Malit të Zi ka hedhur poshtë akuzat e presidentit serb, Aleksandar Vuçiq, se Podgorica po zhvillon “luftë hibride” kundër Serbisë, duke i cilësuar ato si të pabazuara dhe si pasqyrim të mungesës së gatishmërisë së një pjese të elitës politike në Beograd për ta pranuar Malin e Zi si shtet sovran.

Në një deklaratë të publikuar në platformën X, diplomacia malazeze tha se deklaratat e shpeshta që vijnë nga Serbia tregojnë se disa struktura politike ende nuk e shohin Malin e Zi si një shtet të barabartë, por si një hapësirë që duhet t’u rikthehet “qendrave të imagjinuara politike”.

Sipas Podgoricës, retorika e tillë intensifikohet zakonisht në periudha kur Mali i Zi shënon përparim në procesin e integrimit evropian ose kur afrohen zgjedhjet.

“Ia lëmë publikut të vlerësojë nëse deklaratat e tilla duhen parë si hyrje në fushata të reja dezinformimi dhe presionesh politike, apo si përpjekje për të zhvendosur vëmendjen nga problemet që nuk kanë asnjë lidhje me Malin e Zi”, thuhet në reagim.

Ministria malazeze rikujtoi gjithashtu se pavarësia e Malit të Zi është rezultat i një referendumi demokratik dhe i njohur ndërkombëtarisht, duke theksuar se marrëdhëniet e mira me Serbinë mund të ndërtohen vetëm mbi bazën e respektit të ndërsjellë dhe pranimit të realitetit politik.

Reagimi i Podgoricës erdhi pasi presidenti serb Aleksandar Vuçiq deklaroi për Televizionin Prva se mediat malazeze kanë luajtur rol të rëndësishëm në atë që ai e quajti “revolucion me ngjyra” në Serbi dhe se Mali i Zi po zhvillon një “luftë të vërtetë hibride” kundër shtetit serb.

“Kjo është një luftë e vërtetë hibride. Ata po zhvillojnë luftë hibride kundër Serbisë dhe të gjithë marrin pjesë në të ose bëjnë sikur nuk e shohin”, deklaroi Vuçiq.

Ndërkohë, Ministria e Punëve të Jashtme e Serbisë reagoi duke pretenduar se përgjigjja e Podgoricës përbën “konfirmim të natyrës hibride të veprimit të qarqeve të caktuara në Mal të Zi ndaj jetës politike në Serbi”.

Diplomacia serbe theksoi se Serbia nuk e vë në dyshim shtetësinë e Malit të Zi dhe nuk ka pretendime territoriale ndaj tij, por shtoi se ka të drejtë të reagojë ndaj dukurive që, sipas saj, cenojnë marrëdhëniet e fqinjësisë së mirë.

Beogradi bëri thirrje që të gjitha çështjet e hapura mes dy vendeve të zgjidhen përmes dialogut institucional dhe kanaleve diplomatike, duke kërkuar forcimin e bashkëpunimit ekonomik, infrastrukturor dhe të besimit të ndërsjellë.

Polemika e fundit tregon vazhdimin e tensioneve politike dhe retorike mes dy vendeve, pavarësisht deklarimeve zyrtare për nevojën e ruajtjes së marrëdhënieve të mira fqinjësore.

The GeoPost