Deputeti i Listës Studentore në Serbi thotë se s’do të ketë ndryshim qëndrimesh ndaj Kosovës

Profesori i sociologjisë dhe deputeti i Listës Studentore në Serbi, Jovo Bakiq, ka deklaruar se një qeveri e ardhshme serbe nuk do ta njohë pavarësinë e Kosovës, por do të angazhohet për përmirësimin e marrëdhënieve me Prishtinën.

Në një intervistë për gazetën zvicerane “Südostschweiz”, Bakiq ka thënë se qëndrimi i Serbisë ndaj Kosovës do të mbetet i lidhur me Kushtetutën e vendit, por ka theksuar se dialogu duhet të jetë rruga për zgjidhjen e çështjeve ndërmjet dy palëve.

“Ne nuk mundemi dhe nuk do ta njohim Kosovën. Sipas Kushtetutës, ajo është pjesë përbërëse e vendit tonë. Por do të përpiqemi t’i përmirësojmë sa më shumë marrëdhëniet me Prishtinën. Koha e luftërave ka marrë fund prej kohësh. Dialogu është e vetmja rrugë. Por për këtë duhen gjithmonë dy palë”, ka deklaruar Bakiq.

Ai ka paralajmëruar gjithashtu se qeveria e ardhshme duhet të punojë për përmirësimin e marrëdhënieve me Bashkimin Evropian dhe shtetet fqinje, duke kritikuar qeverisjen e presidentit aktual, Aleksandar Vuçiq, për retorikën nacionaliste dhe largimin e Serbisë nga perspektiva evropiane.

Duke folur për Listën Studentore, në kuadër të së cilës është zgjedhur deputet, Bakiq ka pranuar se ky subjekt përfshin përfaqësues me orientime të ndryshme politike, nga e majta në të djathtë.

Sipas tij, dallimet ideologjike mund ta vështirësojnë mbajtjen e një koalicioni të tillë për më shumë se një mandat, por anëtarët e Listës Studentore i bashkon synimi për ndryshimin e gjendjes politike në Serbi.

Ai ka thënë se qëllimi i tyre është ta nxjerrin vendin nga ajo që e ka cilësuar si gjendje të pakontrolluar dhe ta rikthejnë në një sistem ku respektohen Kushtetuta dhe ligjet.

The GeoPost