Eurodeputeti italian sfidon sërish Vuçiqin për debat publik: Në Beograd ose Bruksel, nëse guxon

Eurodeputeti italian Sandro Gozi ka sfiduar sërish presidentin e Serbisë, Aleksandar Vuçiq, për një debat publik ballë për ballë, duke e paraqitur këtë si një test të standardeve demokratike evropiane.

Në një video të publikuar në rrjetin social X, Gozi, sekretar i përgjithshëm i Partisë Demokratike Evropiane (EDP) dhe anëtar i grupit Renew Europe në Parlamentin Evropian, i bëri thirrje Vuçiqit të përballet në debat, qoftë në Beograd, qoftë në Bruksel.

“Debato me mua, Vuçiq, nëse guxon. Në Beograd ose në Bruksel. Ky është standardi bazë demokratik evropian: konfrontim i hapur, jo monologje dhe sulme personale”, deklaroi Gozi.

Ai akuzoi presidentin serb se, në vend të përballjes politike, përdor sulme personale dhe mbështetet, siç tha, te “lojaleistët” e tij për të sulmuar kritikët.

“Unë nuk kam nevojë për gjykatës të bindur dhe nuk jam ai që duhet të negociojë”, shtoi eurodeputeti italian, duke e lidhur sfidën me kritikat e tij të vazhdueshme për gjendjen e demokracisë, sundimit të ligjit dhe lirisë së medias në Serbi.

Sfidës së re i parapriu një intervistë e Vuçiqit në televizionin shtetëror serb RTS, ku presidenti serb i kushtoi disa minuta kritikave ndaj Partisë Demokratike Evropiane dhe vetë Gozit.

Pas kësaj, Gozi e kishte ftuar fillimisht Vuçiqin në një debat në televizionin N1, medium i perceptuar si kritik ndaj pushtetit në Serbi.

Edhe pse Vuçiq kishte deklaruar publikisht se e pranonte ftesën, më pas të dyja palët shkëmbyen akuza se pala tjetër po shmangej nga organizimi i debatit.

Në postimin e ri, Gozi e përsëriti thirrjen, duke e paraqitur atë si një çështje parimore dhe jo thjesht si përplasje personale.

Debate me, @avucic , if you dare. pic.twitter.com/Qc2ShUcjmb

— Sandro Gozi (@sandrogozi) April 23, 2026