Vuçiqi pësoi humbje pas 14 vitesh: Studentët fituan 139 mandate, lista e tij mbeti në 104

Dallimi mes dy listave tregon qartë përmasat e humbjes politike të pushtetit. Studentët kanë 35 mandate më shumë se lista e Vuçiqit, ndërsa qytetarët, sipas këtyre projeksioneve, pas 14 vjetësh kanë vendosur të hapin një kapitull të ri.

Sipas të dhënave të CeSID-it dhe Ipsos-it, të bazuara në 56 për qind të mostrës së përpunuar, lista studentore ka fituar 52 për qind të votave, ndërsa koalicioni i Vuçiqit ka marrë 39,3 për qind.

CeSID dhe Ipsos konfirmojnë epërsinë bindëse të studentëve

Projeksioni i ndarjes së mandateve tregon se lista studentore mund të fitojë 139 ulëse në Kuvend, ndërsa lista e Vuçiqit 104.

Nga listat e tjera zgjedhore, sipas të njëjtit projeksion, lista e Rasim Ljajiqit fiton një mandat, Lidhja e Hungarezëve të Vojvodinës tri mandate, SDA e Sanxhakut një mandat, ndërsa Koalicioni Shqiptar dy mandate.

Veçanërisht domethënës është fakti se lista e Ivica Daçiqit, “Faktori i Stabilitetit”, sipas këtij projeksioni, nuk ka arritur të fitojë asnjë mandat.

Koalicioni Shqiptar fiton dy mandate

Sipas projeksioneve të CeSID-it dhe Ipsos-it, të bazuara në 56 për qind të mostrës së përpunuar, Koalicioni Shqiptar ka fituar 0,8 për qind të votave, duke siguruar dy mandate në Kuvendin e Serbisë.

Kështu, përfaqësuesit politikë të shqiptarëve do të kenë përfaqësimin e tyre në përbërjen e re të Kuvendit Popullor të Serbisë.

Pas 14 vjetësh, qytetarët kërkojnë ndryshim

Nata e zgjedhjeve u shoqërua me festime në shtabin e studentëve dhe në rrugët e qyteteve të ndryshme të Serbisë. Studentët e festuan fitoren me këngën “Serbia po zgjohet”, ndërsa qytetarët dolën në rrugë për të festuar rezultatin.

Vuçiqi tashmë e ka pranuar se lista e tij i ka humbur zgjedhjet, ndërsa projeksionet e fundit të CeSID-it dhe Ipsos-it konfirmojnë edhe më shumë përmasat e kësaj humbjeje.

Pas 14 vjetësh dominim politik, rezultati që tregojnë projeksionet e para përbën një goditje të madhe për pushtetin dhe një mesazh të fuqishëm të qytetarëve se duan një Serbi ndryshe. /The Geopost/