Ish-gjenerali amerikan: Dislokimi i forcave në Lindjen e Mesme, mesazh për Iranin

Gjenerali në pension i ushtrisë amerikane, Joseph Votel, ka vlerësuar se Irani po përdor zvarritjen e negociatave si strategji për të fituar kohë, në një periudhë kur përballet me presion të shtuar ushtarak nga Shtetet e Bashkuara dhe Izraeli.

Në një intervistë për Radio Evropa e Lirë, Votel tha se Teherani ka histori të përdorimit të taktikave të tilla, ndërsa shtoi se procesi aktual mund të jetë kombinim i vonesave të qëllimshme nga Irani dhe përpjekjeve të Uashingtonit për të organizuar negociata më substanciale.

Sipas tij, pauza 10-ditore e shpallur nga presidenti amerikan Donald Trump për të lejuar hapësirë për bisedime, nuk duhet parë si shenjë e menjëhershme e përparimit, por si pjesë e një dinamike më të gjerë diplomatike dhe ushtarake.

Votel theksoi se grumbullimi i forcave amerikane në Lindjen e Mesme ka dy qëllime kryesore: dërgimin e një mesazhi të qartë për Iranin dhe sigurimin e opsioneve të ndryshme për vendimmarrësit në Uashington.

“Ky dislokim rrit fleksibilitetin operacional dhe i jep mundësi lidershipit politik të zgjedhë skenarë të ndryshëm veprimi”, tha ai.

Ai paralajmëroi se pa një marrëveshje politike, mund të kërkohet një prani e zgjatur ndërkombëtare për të garantuar sigurinë në Ngushtica e Hormuzit, një nga rrugët më të rëndësishme globale për transportin e naftës dhe gazit.

Sipas Votel, një nga opsionet e mundshme do të ishte ndërhyrja për të siguruar ishullin Kharg, një pikë kyçe për eksportin e naftës iraniane. Një veprim i tillë, sipas tij, do të shërbente si mjet presioni ndaj Teheranit, por njëkohësisht do të rrezikonte reagim të drejtpërdrejtë nga Irani.

Ai theksoi se, ndonëse janë përmendur skenarë pa përfshirje të trupave tokësore, këto forca mbeten thelbësore qoftë për operacione direkte apo si njësi reagimi të shpejtë.

Votel identifikoi tre qëllime strategjike të mundshme të SHBA-së dhe aleatëve:

Dobësimi i regjimit iranian në mënyrë që të mos kërcënojë fqinjët

Reduktimi i kapaciteteve ushtarake, përfshirë raketat dhe dronët

Parandalimi i zhvillimit të armëve bërthamore dhe kontrolli i uraniumit të pasuruar.

Ai shtoi se edhe në rast të ndërprerjes së luftimeve, patrullimet ndërkombëtare në Ngushticën e Hormuzit mund të zgjasin për një kohë të gjatë, sidomos në mungesë të një marrëveshjeje politike.

“Partnerët ndërkombëtarë do të jenë thelbësorë për të mbajtur këtë angazhim në afat të gjatë”, theksoi ai.

Votel vlerësoi se SHBA-ja po përgatitet të merret me strukturat ekzistuese të pushtetit në Iran, pasi nuk ekziston një opozitë e gatshme për të marrë kontrollin.

Megjithatë, ai paralajmëroi se ndikimi i madh i Gardës Revolucionare Islamike mund të vështirësojë arritjen e një marrëveshjeje për shkak të qëndrimeve të ashpra brenda regjimit.

Sipas tij, grupet e mbështetura nga Irani, veçanërisht rebelët Huthi, paraqesin një kërcënim serioz për stabilitetin rajonal për shkak të kapaciteteve të tyre të avancuara.

Në të njëjtën kohë, ai e cilësoi si shqetësuese mbështetjen e mundshme të Rusisë për Iranin, përfshirë ndarjen e inteligjencës dhe teknologjisë ushtarake.

“Ky është një problem që duhet adresuar përmes diplomacisë, pasi mund të zgjasë dhe komplikojë më tej konfliktin”, përfundoi Votel.

The Geopost