Kryetari i Dumës Shtetërore ruse, Vyacheslav Volodin, ka bërë deklarata duke fajësuar Shtetet e Bashkuara, Bashkimin Evropian dhe Ukrainën për luftën në Ukrainë, ndonëse faktet ndërkombëtare tregojnë se konflikti nisi me pushtimin rus në vitin 2022.
Në një deklaratë të raportuar nga RT Balkan, Volodin pretendoi se SHBA-ja dhe disa vende evropiane janë drejtpërdrejt përgjegjëse për situatën në Ukrainë.
“Shtetet e Bashkuara, Anglia, Gjermania dhe Franca janë të përfshira drejtpërdrejt në situatën në Ukrainë. Nëse nuk do të kishte qenë veprimet e liderëve të tyre – Bidenit, paraardhësve të Macronit dhe vetë Macronit, si dhe liderëve të Gjermanisë dhe Anglisë – nuk do të kishte konflikt në Ukrainë. Presidenti ynë bëri gjithçka që mundi për ta parandaluar atë”, ka deklaruar ai.
Megjithatë, këto pretendime bien ndesh me faktet e dokumentuara ndërkombëtarisht.
Lufta në Ukrainë filloi më 24 shkurt 2022, kur Rusia nisi pushtimin ushtarak ndaj Ukraine, një akt i dënuar gjerësisht nga komuniteti ndërkombëtar.
Po ashtu, deklaratat e Volodinit se NATO ka shkaktuar konfliktin konsiderohen dezinformuese.
NATO nuk ka ndërmarrë veprime ushtarake kundër Rusisë dhe nuk e ka nisur luftën, por ka reaguar pas fillimit të pushtimit duke ofruar mbështetje për Ukrainën.
Pretendimi se presidenti rus Vladimir Putin është përpjekur të parandalojë luftën gjithashtu kundërshtohet nga zhvillimet paraprake.
Para nisjes së pushtimit, Rusia kishte grumbulluar forca të mëdha ushtarake në kufirin me Ukrainën dhe kishte ndërmarrë hapa që çuan në përshkallëzimin e situatës, duke sinjalizuar përgatitje për veprim ushtarak.
Gjithashtu, fajësimi i Perëndimit për konfliktin nuk mbështetet nga faktet.
Mbështetja e ofruar nga liderë si Joe Biden dhe Emmanuel Macron ndaj Ukrainës ka ardhur si reagim ndaj pushtimit rus, dhe jo si shkak i tij. Kjo qasje reflektohet edhe në qëndrimet e institucioneve ndërkombëtare, përfshirë Gjykata Ndërkombëtare e Drejtësisë.
Deklaratat e fundit të Volodinit vlerësohen si pjesë e një narrative më të gjerë që synon të zhvendosë përgjegjësinë për luftën në Ukrainë dhe të ndikojë perceptimin publik ndërkombëtar mbi origjinën e konfliktit./The Geopost/
/The Geopost/
“Radar” publikon dokumentet ekskluzive të mbikëqyrjes sekrete të kritikëve të Vuçiqit nga BIA 
Vuçiq fali 49 persona para largimit nga presidenca, në listë ish-zyrtarë dhe persona të përfshirë në incidente 
Humbja e Vuçiqit në Serbi, a po i vjen fundi ndikimit të Beogradit mbi Listën Serbe në Kosovë? 
Një Serbi pa Vuçiqin, por me të njëjtën politikë ndaj Kosovës? 
Ekspertët serbë: Studentët marrin pushtetin, por jo një Serbi të shkëputur nga Rusia dhe Kina 
Nga Moska në Beograd: Lufta e narrativave dhe rreziku i manipulimit të informacionit në Kosovë