Moldavia thotë se qytetarët e saj u trajnuan në Rusi, Serbi e Bosnjë e Hercegovinë për të organizuar trazira

Policia moldave tha të enjten se kishte zbuluar një program në të cilin qindra qytetarë të saj u dërguan në Rusi për t’iu nënshtruar trajnimeve për të organizuar trazira, një akuzë e fundit në një mori akuzash për ndërhyrje përpara zgjedhjeve të së dielës. Po ashtu, ata u dërguan edhe në Serbi e Bosnjë e Hercegovinë.

Policia tha në fillim të këtij muaji se grupet e krimit të mbështetura nga Rusia kishin korruptuar një sërë votuesish dhe kishin komplotuar për të penguar zgjedhjet presidenciale të kësaj fundjave dhe referendumin mbi aspiratat e vendit për anëtarësim në Bashkimin Evropian, duke shkuar deri në një plan për të kapur ndërtesa shtetërore.

Autoritetet thanë se njerëzit ishin marrë rregullisht në grupe prej rreth 20 vetësh për t’iu nënshtruar trajnimeve në Rusi që nga qershori.

Kohët e fundit, më shumë se 300 të rinj nga Moldavia kanë vizituar Rusinë. Synimi i deklaruar ishin ngjarjet kulturore, kur në fakt ata vizituan kampet ku morën udhëzime për trazira në Moldavi, tha shefi i policisë kombëtare Viorel Cernauteanu.

“Disa nga ata njerëz u trajnuan në kampe të lidhura me kompani private ushtarake në territorin e Bosnje dhe Hercegovinës, si dhe në Serbi”, tha ai.

Rusia, e cila akuzon qeverinë pro-perëndimore për nxitjen e “rusofobisë”, ka mohuar ndërhyrjen në Moldavi,  e cila nisi përshpejtimin për t’u larguar nga orbita e Moskës pas pushtimit të plotë të Rusisë në Ukrainën fqinje në shkurt 2022.

Policia moldave tha në një konferencë shtypi se agjencitë e zbatimit të ligjit besonin se një grup i lidhur me biznesmenin e arratisur pro-Kremlinit Ilan Shor kishte organizuar trajnimin për të organizuar trazira.

“Prokuroria kundër korrupsionit aktualisht po kryen një hetim për disa çështje penale që lidhen me përgatitjen e trazirave masive në interes të komunitetit kriminal”, tha prokurori Viktor Furtuna.

Shor, i cili është nën sanksionet e SHBA-së për ndërhyrje të supozuar në zgjedhje në emër të Rusisë, mohon veprat ose të jetë një përfaqësues politik rus.

/www.reuters.com