Petkoviq dezinformon: Arrestimet e serbëve janë të motivuara politikisht

E ashtuquajtura “Zyra për Kosovën” në Serbi lëshoi një deklaratë duke dezinformuar se “arrestimet e serbëve në Kosovë janë të motivuara politikisht dhe pjesë e një fushate të pretenduar të kryeministrit të Kosovës Albin Kurti për të provokuar një krizë të re”. Ky pretendim është pjesë e një fushate më të gjerë propagandistike nga Beogradi për të nënçmuar autoritetet e Kosovës dhe për të larguar vëmendjen nga përgjegjësitë e veta.

Çfarë tha Petkoviq:

“Është e qartë se Kurti, duke vazhduar terrorin që zakonisht e bën gjatë diskutimeve për mundësitë e rifillimit të dialogut, dëshiron të provokojë serbët në Kosovë dhe të rëndojë më tej situatën në terren dhe të ikë nga obligimet e tij në dialog.

Arrestimi i mbrëmshëm i Llazar D. në pikën famëkeqe të urës në Bistricë për ngjarjet e vitit të kaluar përballë komunës së Zveçanit ka qenë i motivuar thjesht për arsye politike dhe është një përpjekje e re e Albin Kurtit për të përkeqësuar situatën në veri të Kosovës dhe të shkaktojë një krizë të re”, thuhet në njoftimin për shtyp.

Analiza:

Arrestimet në Kosovë janë rezultat i shkeljes së ligjit, jo i strategjive politike. Arrestimi i L.D. lidhet me përfshirjen e tij në incidente të dhunshme, jo me një përpjekje të Kosovës për të provokuar tensione. Policia e Kosovës njoftoi se L.D. u ndalua për përfshirjen e tij në incidentet para ndërtesës së komunës në Zveçan, duke treguar arsye ligjore e jo politike për arrestimin e tij.

E ashtuquajtura Zyra për Kosovën përdor dezinformimin dhe manipulimin për të krijuar një imazh të kërcënimit të vazhdueshëm ndaj serbëve në veri të Kosovës. Këto aktivitete propagandistike kanë për qëllim destabilizimin e situatës në Kosovë dhe minimin e përpjekjeve ndërkombëtare për ruajtjen e paqes dhe stabilitetit në rajon.

Në deklaratë nuk përmendet se arrestimet dhe ndalimet janë rezultat i një procesi gjyqësor dhe se të dyshuarit janë arrestuar nën dyshimin për vepra penale dhe jo për arsye politike. Në këtë mënyrë, Zyra injoron përpjekjet legjitime të autoriteteve të Kosovës për të rivendosur rendin dhe ligjin.

Deklarata të tilla shërbejnë për të manipuluar opinionin publik dhe për të krijuar një imazh të agresionit të vazhdueshëm dhe padrejtësisë ndaj serbëve në Kosovë, gjë që vështirëson çdo përpjekje për dialog paqësor.

/The Geopost