Serbia ia mundëson kumbarit të Putinit themelimin e një organizate kundër Ukrainës, proteston ambasada ukrainase

Më 5 dhjetor 2023, Ambasada e Ukrainës në Serbi i dërgoi një protestë zyrtare Ministrisë së Punëve të Jashtme të Serbisë në të cilën shpjegon kërkesën për ndërprerjen e veprimtarisë së zyrës përfaqësuese “Ukraina tjetër”.

Siç u tha nga ambasada ukrainase, kërkesën e kanë bërë në bazë të dispozitave të Artikullit 29 të Ligjit të RS për shoqëritë tregtare, i cili nuk lejon përdorimin e emrit të shtetit në emrin zyrtar të një personi juridik pa lejen e shtetit të huaj përkatës, shkruan Danas, transmeton The Geopost.

Në vitin 2023, në Serbi u krijua zyra përfaqësuese “Ukraina tjetër”, themeluesi zyrtar i së cilës është kumbari i presidentit të Rusisë Vladimir Putin – Viktor Medvedchuk, dhe përfaqësuesi ligjor në Serbi është Dragan Stanojeviq, biznesmen nga Ukraina dhe deputet në listën “Ne – zëri nga populli” Branimir Nestoroviq.

“Përveç aspektit juridik, ka edhe aspekt politik”

Ambasada e Ukrainës sqaron për gazetën serbe Danas se anulimi i kësaj përfaqësie është aktualisht në sferën ligjore, por theksojnë se kjo çështje ka edhe aspekt politik.

“Është e trishtueshme të theksohet se këtu vazhdojnë përpjekjet e disa forcave politike për të zbatuar një skenar antiukrainas, për të nxitur përhapjen e provokimeve të pista nga kumbari i kriminelit ndërkombëtar Putin”, thuhet në reagimin e ambasadës ukrainase.

Siç shtohet, është veçanërisht e pakëndshme të flitet për këtë “në një kohë kur Ukraina po gjakoset duke u përpjekur të konsolidojë përpjekjet e komunitetit ndërkombëtar, për të krijuar një platformë për rivendosjen e rendit juridik botëror dhe bashkëjetesës paqësore, e cila ka qenë quajtur ‘Formula e Paqes’.

Ambasada e Ukrainës tha se përfaqësimi i lëvizjes ruse nuk përfaqëson interesat e Ukrainës, porse synon të kryejë aktivitete anti-ukrainase në territorin e Serbisë, që synojnë shkatërrimin e popullit ukrainas dhe Ukrainës si shtet i pavarur.

Ukraina para disa viteve kishte mbyllur një organizatë që gjoja mbronte interesat e serbëve në Ukrainë, por që në fakt mbështeste Rusinë.

Derisa në botën demokratike perëndimore shpërthyen marshe pro Ukrainës, në Serbi ndodhi e kundërta. Në rrugët e Beogradit e qyteteve të tjera serbe u madhërua Vladimir Putini për luftën që po zhvillon në Ukrainë.

Gjithashtu, aktivistët rusë kundër luftës në Ukrainë u përndoqën nga regjimi serb dhe disa edhe u rrahën nga nacionalistët.