Vulin në Moskë takohet me shefin e Shërbimit të Inteligjencës për të forcuar bashkëpunimin Rusi-Serbi

Zëvendëskryeministri i Serbisë, Aleksandar Vulin ka udhëtuar sërish në Moskë dhe atje është takuar me drejtorin e Shërbimit Federal të Sigurisë së Federatës Ruse, Aleksandar Bortnikov, për “vazhdimin e bashkëpunimit ndërmjet strukturave të sigurisë së Serbisë dhe Rusisë dhe përballjen me sfidat e përbashkëta”.

“Aleksandar Vulin theksoi se Serbia i është mirënjohëse Rusisë, Shërbimit Federal të Sigurisë dhe drejtorit Bortnikov për mbështetjen e vazhdueshme ndaj Beogradit në të gjitha çështjet e vështira”, thuhet në njoftimin e qeverisë serbe.

Në anën tjetër, drejtori i Shërbimit Federal të Sigurisë së Federatës Ruse duke falënderuar zëvendëskryeministrin e Qeverisë së Serbisë “për profesionalizmin dhe kontributin e tij në përmirësimin e bashkëpunimit ndërmjet shërbimeve serbe dhe ruse” tregoi se Rusia dhe Serbia vazhdojnë të jenë partnere të ngushta në fushën e sigurisë.

Vulin paraprakisht ka biseduar me drejtorin e Shërbimit Informativ të Jashtëm të Rusisë, Sergej Naryshkin, për forcimin e mëtejshëm të bashkëpunimit ndërmjet strukturave të sigurisë së Serbisë dhe Rusisë.

Vulin, i cili ndodhet në një vizitë zyrtare në Federatën Ruse, falënderoi drejtorin Naryshkin për “partneritetin dhe mbështetjen e besueshme dhe gjithmonë të sigurt për Serbinë”.

“Përpjekjet e zëvendëspresidentit Vulin, i cili gjatë kryerjes së funksioneve të ministrit të Mbrojtjes, atij të Brendshëm dhe drejtorit të Agjencisë së Sigurisë dhe Informacionit, ndikoi në zhvillimin e marrëdhënieve të mira ndërmjet shërbimeve serbe dhe ruse”, tha Naryshkin.

Përveç takimit të tij me Naryshkin, Vulin është planifikuar të takohet me zyrtarë të tjerë rusë.
Vulin konsiderohet si një nga përkrahësit më të fortë të Kremlinit brenda peizazhit politik të Serbisë. Ai u takua më parë me presidentin rus Vladimir Putin gjatë Forumit Ekonomik Lindor në Vladivostok, ku ai afirmoi statusin e Serbisë jo vetëm si një partner strategjik, por edhe një aleat i Rusisë.

Në fillim të këtij viti, Vulin mori vlerësime nga presidenti i Rusisë dhe Shërbimi Federal i Sigurisë.

Vulin është në listën e sanksioneve të Departamentit të Shtetit të SHBA-së për shkak të lidhjeve të tij me Rusinë dhe akuzave për korrupsion derisa ishte në krye të BIA-s.

Pavarësisht kësaj pushteti në Serbia ia dha më pas postin e zëvendëskryeministrit, të cilin po e shfrytëzon për të mbajtur lidhjet me Rusinë, ndërsa presidenti i Serbisë dhe kryeministri pretendojnë se Bashkimin Evropain e kanë synim strategjik.

Serbia dhe Rusia kanë një traditë të gjatë të lidhjeve të ngushta. Serbia është ndër vendet e pakta evropiane që ka refuzuar të vendosë sanksione ndaj Kremlinit në përgjigje të pushtimit rus të Ukrainës./The Geopost/