Vrasjet me snajperë në Sarajevë, gazetari thotë se Vuçiq ishte organizatori

Presidenti serb, Aleksandër Vuçiq ishte i përfshirë në vrasjet me snajperë në Sarajevë, gjatë luftës në Bosnje e Hercegovinë, ka thënë gazetari investigativ kroat, Domagoj Margetiq.

Në një intervistë për Balkan Talks në Euroneës Albania, ku ka folur mbi shkrimin e tij të fundit investigativ lidhur me këtë cështje, Margetiq ka thënë se hetimi i tij përfshin dëshmi dhe dokumente që tregojnë përfshirjen e Vuçiqit në një njësi paraushtarake serbe, e cila vepronte pranë Sarajevës.

Sipas tij, kjo njësi paraushtarake që udhëhiqej nga Mirko Blagojeviq, kishte leje të veçanta kalimi nga institucionet serbe të kohës.

Vuçiq shoqëronte të ashtuquajturit “klientë” dhe mbante një mjet identifikimi të shërbimeve sekrete serbe, ka thënë ai.

“Në afërsi të Sarajevës, ata udhëhiqeshin nga njerëz të një njësie paraushtarake. Ajo që zbulova është se Vuçiq ishte një nga ata që shoqëronte ‘klientët’ dhe mbante identifikim të shërbimeve sekrete serbe. Mirko Blagojeviq ka thënë se Vuçiq ishte ai që mundësonte lëvizjen e tyre”, tha Margetiq.

Ai po ashtu bëri të ditur se informacionet e mbledhura vijnë nga ish-pjesëtarë të forcave paraushtarake serbe dhe nga ushtarë që kanë marrë pjesë në atë periudhë.

“Kjo ‘safari’ drejtohej nga Sllavko Aleksiq dhe Vuçiq ishte pjesë e njësisë”, tha ai, duke theksuar se në raportin e tij nuk ka fajësuar qytetarët serbë, por individët e përfshirë në aktivitetet e paligjshme.

Deklaratat e Margetiqit kanë shkaktuar reagime të shumta në rajon, duke rikthyer vëmendjen te aktivitetet paraushtarake gjatë rrethimit të Sarajevës dhe rolin e zyrtarëve të sotëm në ngjarjet e luftës.

Avokati serb Çedomir Stojkoviq ka shkruar mbi raportimet e mediave botërore për “Safarin e Snajperëve”, ai ka ngrehur edhe padi ndaj Vuciqit lidhur me këtë cështje.

Sipas raportimeve, Safari i snajperëve është organizuar nga njësitë famëkeqe të kriminelëve serbë Radovan Karaxhiq dhe Ratko Mlladiq për vrasje rekreative në Sarajevë gjatë rrethimit në vitet 1992-96, për të cilat një prokuror italian ka nisur hetimet.

Stojkoviq ka publikuar pamjet e Aleksandar Vuçiq nga ajo periudhë që tregojnë se ai mbante një pushkë ose snajper derisa po shëtiste kodrat nga ku gjuajtjet me snajper vranë civilë në Sarajevë./TheGeopost