Simbol i marrëdhënieve të ngushta me Kinën, Serbia – mysafire nderi në Expo China-CEEC 2027 në Ningbo

Serbia është ftuar të marrë pjesë si mysafire nderi në Ekspozitën China-CEEC 2027, që do të mbahet në qytetin Ningbo të provincës Zhejiang, që pasqyron marrëdhëniet gjithnjë e më të ngushta dhe bashkëpunimin e qëndrueshëm midis Serbisë dhe Kinës.

Ftesa u bë gjatë vizitës së delegacionit serb në edicionin e katërt të kësaj ekspozite, të udhëhequr nga ministrja e Tregtisë së Brendshme dhe të Jashtme, Jagoda Lazareviq.

Sipas mediave serbe, delegacioni serb zhvilloi një takim zyrtar me delegacionin e provincës Zhejiang, të kryesuar nga zëvendësguvernatori Lu Shan, i cili në emër të autoriteteve kineze shprehu vlerësimin për bashkëpunimin aktual me Serbinë dhe dëshirën për forcimin e mëtejshëm të marrëdhënieve dypalëshe.

Ftesa që Serbia të jetë mysafire nderi në një nga ngjarjet më të rëndësishme ekonomike dhe tregtare në Kinë dëshmon edhe njëherë raportet ndërmjet dy vendeve, si dhe shihet si një mundësi për thellimin e mëtejshëm të partneritetit ekonomik dhe kulturor.

Kujtojmë se, Serbia e ka mbështetur Kinën në çështjen e Tajvanit duke respektuar politikën e “Një Kine” dhe nuk ka marrëdhënie zyrtare me Tajvanin. Ky pozicion është konfirmuar në mënyrë të përsëritur nga zyrtarë serbë dhe është një nga shtyllat kryesore të marrëdhënieve të ngushta midis Beogradit dhe Pekinit.

Ky qëndrim përputhet me interesat strategjike të Kinës dhe ka ndihmuar në forcimin e partneritetit politik mes dy vendeve. Në këmbim, Kina ka mbështetur Serbinë në forume ndërkombëtare për çështje të tjera, përfshirë mosnjohjen e pavarësisë së Republikës së Kosovës.

Kjo ndihmon të shpjegojë pse Kina dhe Serbia e përshkruajnë marrëdhënien e tyre si një “miqësi të çeliktë” dhe pse bashkëpunimi i tyre është thelluar në fusha të ndryshme.

/The Geopost