Serbët e Bosnjës organizojnë protesta pro-Putinit

Rreth njëqind nacionalistë serbë të Bosnjës protestuan në qytetin e dytë më të madh të vendit, Banjaluka, në mbështetje të pushtimit të Ukrainës nga presidenti rus Vladimir Putin.

Pjesëmarrësit valëvitën flamujt rusë dhe e përshkruan vendimin e Rusisë për të pushtuar fqinjin e saj si një “betejë legjitime për të çliruar popullin e nënshtruar [të Ukrainës]”.

“Rusia nuk është në luftë me Ukrainën, ajo është në luftë me forcat e errëta euroatlantike që duan të dominojnë botën dhe ta shkatërrojnë atë”, tha njëri prej protestuesve.

Protestat pro-ruse janë shumë të pakta në Evropë që kur Moska pushtoi Ukrainën më 24 shkurt.

Demonstratat më të mëdha në mbështetje të Kremlinit panë mijëra njerëz që dolën në rrugët e kryeqytetit të Serbisë, Beogradit më 4 mars, duke mbajtur pankarta me shkronjën Z – tani sinonim i pushtimit – dhe flamuj nacionalistë rusë dhe serbë.

Protesta në Banjaluka u organizua nga anëtarët e Ujqërve të Natës, një degë lokale e klubit rus të motoçikletave që mbështet me vendosmëri Presidentin Vladimir Putin.

Putini i është referuar vazhdimisht grupit si “miq” dhe është shfaqur në mitingjet e tyre, duke hipur në një motoçikletë Harley-Davidson. Ujqërit e Natës morën pjesë në pushtimin e Krimesë në vitin 2014 dhe në luftimet në Donbas.