Rusia revokon regjistrimin e Novaya Gazeta, dënohet gazetarja televizive

Rregullatori rus i medias Roskomnadzor ka ngritur një padi në një gjykatë në Moskë për të revokuar regjistrimin e gazetës së pavarur Novaya Gazeta më pak se një vit pasi kryeredaktori i saj Dmitry Muratov fitoi Çmimin Nobel për Paqen 2021.

Gjykatësi ka tre ditë për të vendosur mbi gazetën, e cila filloi botimin në 1993 dhe ishte një nga botimet më të respektuara në Rusinë post-sovjetike.

Novaya Gazeta, një nga mediat e fundit të pavarura ruse, pezulloi operacionet brenda vendit në mars pasi u detyrua të hiqte materiale nga faqja e saj e internetit në lidhje me pushtimin e paprovokuar të Ukrainës nga Rusia.

Disa punonjës u larguan nga Rusia pasi ajo pushoi së botuari dhe e nisën prap gazetën Novaya Gazeta. Evropa nga kryeqyteti i Letonisë, Riga.

Rregullatori rus i medias, Roskomnadzor, bllokoi faqen e internetit brenda Rusisë.

Muratov mbeti në Rusi pavarësisht kundërshtimit të tij të zëshëm ndaj konfliktit në Ukrainë.

Menjëherë pas pushtimit rus të Ukrainës më 24 shkurt, Moska miratoi një ligj që kriminalizon përhapjen e informacionit “të rremë” që “diskrediton forcat e armatosura”.

Ligji shërbeu si bazë për një goditje masive kundër atyre që kundërshtonin luftën.

Dënohet gazetarja ruse

Gazetarja televizive ruse Marina Ovsyanikova, e njohur për protestat e saj të drejtpërdrejta kundër luftës, është dënuar për “diskreditim” të forcave të armatosura të vendit në postimet e mediave sociale që dënojnë veprimet e Moskës në Ukrainë.

“Provat vërtetojnë fajësinë e Ovsjanikova. Nuk ka asnjë arsye për të dyshuar vërtetësinë e tyre,” tha gjyqtari i Gjykatës së Qarkut Meshchansky të Moskës pas një seance të shkurtër më 28 korrik, në të cilën Ovsyanikova e përshkroi procedurën si “absurde”.

Ajo u gjobit me 50,000 rubla (822 dollarë) për postimet e saj në rrjetet sociale.

Në fillim të këtij muaji, Ovsyanikova shpalosi një poster në sfondin e Kremlinit me fjalët “Putini është një vrasës, ushtarët e tij janë fashistë” dhe foto të fëmijëve të vrarë në Ukrainë. Ajo nuk u ndalua atëherë.

Megjithatë, disa ditë më vonë, më 17 korrik, ajo u arrestua dhe u lirua ndërsa ishte në shtëpinë e saj në Moskë.

Ovsyanikova tërhoqi vëmendjen e publikut më 14 mars kur ajo hyri në studio gjatë një programi të drejtpërdrejtë në Kanalin e Parë të Rusisë, duke mbajtur një poster ku shkruhej “Ndalo luftën. Mos i besoni propagandës, po të gënjejnë”.

Në të njëjtën kohë, ajo bërtiti: “Ndaloni luftën”. Jo luftës”. /RSE