Protesta e dhunshme në Novi Sad, Petkoviq përpiqet të fsheh tragjedinë – lidhë ngjarjen me Kosovën

Gjatë një proteste në Novi Sad, qyteti i dytë më i madh i Serbisë, demonstruesit thyen xhamat dhe dyert e bashkisë, duke hedhur shishe dhe fishekzjarre brenda. Policia përdori gaz lotsjellës për t’i penguar ata të hynin në ndërtesë.

Protestat shpërthyen pas vdekjes së 14 personave nga shembja e tendës së stacionit hekurudhor në atë qytet dhe protestuesit kërkuan llogari nga qeveria dhe dorëheqje.

Këto protesta tentoi t’i lidhë me kryeministrin e Kosovës, Albin Kurti, drejtori i Zyrës së ashtuquajtur për Kosovën, Petar Petkoviq, pa ndonjë bazë. Ai shtoi se kjo nuk është rastësi ndërsa dezinformoi se ka “ekstremistë të Kurtit” që e përdhosin flamurin e Serbisë.

“Është e papranueshme që mbrëmë në Novi Sad individë të përdhosën flamurin e Serbisë dhe vandalizuan institucionet serbe, ashtu siç po bën Kurti dhe ekstremistët e tij në Kosovë. Kjo nuk është një rastësi, sepse Kurti dhe rebelët në Novi Sad kanë të njëjtin interes dhe metoda: që Serbia dhe gjithçka serbe të frenohet dhe dobësohet nga dhuna. Por Serbia dhe populli serb do të fitojnë! Pas skenave të pakëndshme të mbrëmshme, është e qartë se tërbimi i aktivistëve të opozitës nuk ka të bëjë fare me ngjarjen tragjike në Novi Sad, trishtim apo ndjeshmëri, por tentativë tinëzare për të keqtrajtuar viktimat”, ka shkruar Petkoviq në rrjetin e tij social, X.

Gjatë protestës, Bashkia e Novi Sadit raportoi se demonstruesit hodhën bojë të kuqe dhe gurë në ndërtesë, duke thyer disa xhama. Ata thanë se synonin të hynin në ndërtesë për të paraqitur kërkesat e tyre tek autoritetet.

Protestuesit kërkuan përgjegjësi për tragjedinë dhe kërkuan dorëheqjen e kryeministrit Milos Vuçeviq dhe kryetarit të bashkisë së Novi Sadit, Milan Gjuriq. Ata vendosën një afat prej 48 orësh për plotësimin e kërkesave të tyre.

Presidenti serb Aleksandar Vuçiq tha se policia tregoi “përmbajtje të madhe gjatë demonstratave të dhunshme” dhe tha se të gjithë autorët e protestës do të ndëshkohen.

Kryeministri serb Vuçeviç tha se ndërtesa e bashkisë është simbol i qytetit dhe e konsideroi vandalizmin e saj një fyerje për banorët e Novi Sadit. Ai akuzoi protestuesit se e shfrytëzojnë “tragjedinë për përfitime politike”.

/TheGeopost