Nëna e viktimës në Novi Sad në grevë urie për ditën e tretë pranë Kuvendit të Serbisë

Dijana Hrka, djali i së cilës vdiq në aksidentin në Novi Sad, është në ditën e tretë të grevës së urisë të martën, pranë ndërtesës së Kuvendit të Serbisë në qendër të Beogradit.

Ajo kërkon llogaridhënie për vdekjen e fëmijës së saj dhe 15 personave të tjerë në shembjen e strehës së rindërtuar të Stacionit të Trenit.

Qytetarët u mblodhën në numër të madh pranë Kuvendit në orët e mbrëmjes për të mbështetur Dijana Hrka.

Ajo thekson se një vit pas aksidentit në Novi Sad, i cili nxiti edhe një valë protestash masive anti-qeveritare në Serbi, askush nuk është mbajtur përgjegjës.

“Ka shumë emocione. Pak trishtim, pak emocione, por është mirë. Kur unë e di për një vit se askush nuk është dënuar për vrasjen e fëmijës tim, është vrasje. Është sistemi, është korrupsioni. Përderisa askush nuk është dënuar, askush nuk është arrestuar, dhe shumë njerëz nuk janë marrë në pyetje, çfarë tjetër të bëj? Të rri duarkryq dhe të pres që ta mbulojnë,” tha Hrka për Radio Evropa e Lirë (RSE).

Një rrethim dhe kordonë policie e ndajnë atë nga vendbanimi i tendave të mbështetësve të qeverisë, të cilët i përgjigjen grevës së Hrka-s me muzikë të lartë dhe sulme ndaj demonstruesve anti-qeveritarë që e mbështesin atë.

“Fakti që ata lëshojnë disa këngë që më ofendojnë, nuk ka rëndësi. Unë do të duroj, nuk do të më thyejnë psikologjikisht. Këtë po ua them, nuk do të heq dorë sepse të gjithë duhet të mbajnë përgjegjësi për veprimet e tyre,” theksoi Hrka.

Gjatë ditës së tretë të grevës së urisë së Dijana Hrka-s, më 4 nëntor, qytetarë dhe studentë erdhën para Kuvendit të Serbisë për t’i ofruar mbështetje.

“Jam shumë i lumtur që shoh që kaq shumë njerëz po vijnë, dhe pavarësisht fjalë për fjalë gjithçkaje që mund të ndodhë, ata janë këtu me të,” theksoi Sergej nga Beogradi.

“Është e tmerrshme që askush nuk u gjet përgjegjës dhe që askush nuk është ndëshkuar,” shtoi Esma.

Živan nga Beogradi tha se bashkëndjen “me gjithë zemër e shpirt” me nënën që kërkon llogaridhënie për vdekjen e djalit të saj me grevë urie.

“Si qytetarë jemi të dëshpëruar, po kërkojmë mbështetje nga të gjitha anët,” shtoi ai.

Përfaqësuesit e qeverisë, të udhëhequr nga Presidenti i Serbisë, Aleksandar Vuçiq, i bënë thirrje Hrka-s të ndërpresë grevën e urisë.

Vuçiq, në të njëjtën kohë, e quajti vendbanimin e tendave të mbështetësve të qeverisë një “simbol të lirisë” dhe akuzoi demonstruesit që mbështesin Hrka-n se “sulmuan” atë kamp.

“Ata [përfaqësuesit e qeverisë] me siguri nuk guxojnë të më shohin në sy. Ajo që më thonë përmes mediave nuk do të thotë asgjë për mua, madje as nuk e dija. Dhe nëse do të vinin [këtu], mund të flisnim vetëm para këtij populli, dhe në asnjë mënyrë tjetër,” u përgjigj Dijana Hrka për RSE.

Edhe përfaqësuesit e opozitës i ofruan mbështetje Hrka-s, duke e vizituar atë përpara seancës së sotme parlamentare.

Hrka deklaroi se është mirënjohëse ndaj deputetëve të opozitës, por se në këtë luftë – është vetëm.

“Nuk i besoj askujt, askush nuk ishte këtu për një vit, isha vetëm dhe e nisa këtë luftë vetëm. Nuk jam as pozita, as opozita. Të gjithë kishit mundësinë të qëndronit pranë meje këtë vit; askush nuk ishte. Faleminderit, mund t’i përcillni këto tre kërkesa të miat,” u tha ajo atyre.

Gjatë seancës, ata ua përcjellën kërkesat e saj autoriteteve.

Opozita i përcjell kërkesat e Hrka-s në Parlament

Pavle Grbović, një deputet nga Lëvizja opozitare e Qytetarëve të Lirë (PSG), deklaroi se Hrka është në grevë urie “sepse korrupsioni në të cilin mori pjesë qeveria vrau fëmijën e saj.”

“Ekzistojnë tre kërkesa: që të gjithë ata që janë vërtet përgjegjës të ndiqen penalisht, dhe të mos mbrohen politikisht; që të gjithë studentët dhe të gjithë të burgosurit e tjerë politikë të lirohen nga paraburgimi; dhe kërkesa e tretë është që të shpallen zgjedhjet,” përcjell Grbović.

“Pyetja ime është, a e keni vizituar atë grua? A i jeni afruar dhe i keni premtuar të paktën se kërkesat e saj do të plotësohen,” pyeti Grbović.

Ai gjithashtu pyeti Ministrin e Punëve të Brendshme, Ivica Daçiq, pse policia nuk reagoi ndaj provokimeve të drejtuara ndaj Dijana Hrka-s nga vendbanimi i tendave para Kuvendit Kombëtar.

Ai theksoi gjithashtu se qeveria “e ka kthyer gjithçka në cirk,” duke kujtuar se Uglješa Mrdić, një deputet i koalicionit në pushtet, gjithashtu po bën grevë urie para parlamentit.

“Në një vend, një nënë po bën grevë, në një vend tjetër, një ushtar partie po bën grevë. Nëna kërkon drejtësi për fëmijën e saj të vdekur, ushtari i partisë kërkon një shans për të avancuar në hierarkinë e partisë,” vlerësoi Grbović.

Kryetarja e Parlamentit, Ana Bërnabiq, u përgjigj se Mrdić po lufton për “drejtësi” dhe llogaridhënie për shembjen e strehës përmes grevës së tij.

“Të gjithë ata që duan dhe kërkojnë drejtësi, duhet të mbështesin Uglješa Mrdić-in, dhe të mos politizojnë edhe një herë të gjithë këtë situatë dhe të keqpërdorin tragjedinë dhe viktimat për të fituar disa pikë politike të lira dhe të pakuptimta,” shtoi ajo.

Marinika Tepiq, një deputete nga Partia opozitare e Lirisë dhe Drejtësisë (SSP), pyeti të gjithë anëtarët e Qeverisë, Presidentin e Serbisë, Kryetaren e Parlamentit: “A jeni normalë?”

Sipas saj, Dijana Hrka kërkon drejtësi.

“Dhe ju monstra po e tallni këtu minutë pas minute,” tha Tepiq.

“Ku është këtu ndjeshmëria, ku është llogaridhënia? Edhe pak dhe do të filloni të rrotulloni një ka në hell në këtë strofullë paramilitare që keni krijuar para Kuvendit,” tha Tepiq.

Dijana Hrka e njoftoi grevën e saj të urisë më 1 nëntor në një tubim përkujtimor me rastin e përvjetorit të vdekjes së 16 personave në Novi Sad.

Policia nuk e lejoi atë të fillojë grevën para ndërtesës së Kuvendit të Serbisë një ditë më vonë, ku ndodhen tendat e mbështetësve të qeverisë.

E njëjta mbrëmje u shënua nga incidente kur forca të shumta policie ndanë mbështetësit dhe kundërshtarët e qeverisë që kishin ardhur për të mbështetur Hrka-n.

Policia atëherë njoftoi se ishin ndaluar 37 demonstrues, duke i akuzuar ata për prishje të rendit dhe qetësisë publike dhe shkaktim incidentesh.

Nga ana tjetër, demonstruesit, të udhëhequr nga studentët në bllokadë, akuzuan policinë për mosreagim dhe për arrestime selektive – domethënë, se nuk i ndaluan mbështetësit e qeverisë, të cilët ata pretendojnë se shkaktuan incidentet.

Protesta në mbështetje të Dijana Hrka-s po organizohen në disa qytete të Serbisë.

Gjashtëmbëdhjetë persona vdiqën dhe një u plagos rëndë në shembjen e strehës në Stacionin e Trenit në Novi Sad.

Aksidenti ndodhi vetëm katër muaj pasi ndërtesa e stacionit u hap zyrtarisht pas një rindërtimi trevjeçar.

Vdekja e 16 personave çoi në protesta masive anti-qeveritare, të udhëhequra nga studentët, si dhe në bllokada disamujore të universiteteve dhe shkollave.

Ndërkohë, demonstruesit i kanë shtuar kërkesave të tyre edhe shpalljen e zgjedhjeve të parakohshme parlamentare.

Pavarësisht aktakuzave dhe një hetimi kundër ish-zyrtarëve shtetërorë, gjykimet për aksidentin nuk kanë filluar ende./RSE/