Ndalohet Tik-Tok në rrjetet shtetërore të komunikimit për shkak të sigurisë kibernetike

Qeveria e Kosovës sot ka votuar për ndalimin e përdorimit të rrjetit social kinez Tik-Tok në rrjetet shtetërore të komunikimit për të mbrojtur sigurinë kibernetike të vendit.

Në mbledhjen e Qeverisë së Kosovës propozimin për ndalimin e këtij aplikacioni e bëri zëvendësministri i Punëve të Brendshme, Bardhyl Dobra.

“Me qëllim të rritjes ë sigurisë kibernetike, MBP i rekomandon Qeverisë që të ndalojë instalimin dhe përdorimin dhe funksionimin e aplikacionit të rrjetit social tik tok dhe të gjitha shërbimet e tij në të gjitha rrjetet shtetërore të komunikimit dhe në të gjitha pajisjet zyrtare të teknologjisë së informacionet dhe komunikimit që janë në pronësi dhe menaxhim të institucioneve publike”, tha ai.

“Obligohen të gjitha institucionet publike që janë pronarë dhe administrojnë rrjete shtetërore të komunikimit që të vendosin kufizimet e nevojshme teknike për ndalimin dhe funksionimin tëshërbimeve të rrjetit social Tik Tok në ambiente zyrtare tëpunës.  Të gjithë zyrtarët janë të detyruar që në pajisjet zyrtare ta largojnë aplikacionin tik-tok”, ka shtuar Dobra.

“Kjo masë është në harmoni me nenin 16 , paragrafi 13 të Ligjit për Siguri Kibernetike, veprimet e ndërmarra nga shtetet aleate dhe ka për synim të mbrojë institucionet shtetërore tëRepublikës së Kosovës kundër kërcënimeve dhe veprimeve tësigurisë kibernetike të cilat mund të shfrytëzohen për sulme ndaj infrastrukturës së teknologjisë, informacionit dhe komunikimit të institucioneve shtetërore”, përfundoi ai.

Shumë shtete, përfshirë edhe SHBA-në, kanë shfaqur shqetësimet për përdorimin e Tik Tok. Në dhjetor 2022, edhe Tajvani kishte vendosur një ndalim në sektorin publik për TikTok pasi FBI paralajmëroi se TikTok përbënte një rrezik për sigurinë kombëtare./TheGeopost/