Maqedonia e Veriut dëbon tre diplomatë rusë dhe një prift

Tre diplomatë të Federatës Ruse, të akredituar në Maqedoninë e Veriut, janë shpallur persona të padëshiruar dhe pritet të dëbohen nga vendi për shkak të veprimtarisë jashtë kompetencave diplomatike, njoftoi sot portali Almakos, përcjell TheGeopost.com.

Duke u thirrur në burime të konfirmuara brenda Ministrisë së Punëve të Jashtme (MPJ) të Maqedonisë së Veriut, portali thotë se bëhet fjalë për këshilltarët politikë I. Hropjaçkov, A. Rozhdevsdvenski, si dhe atasheun ushtarak S. Popov. Ky i fundit raportohet të ketë bërë “veprime të pahijshme diplomatike”.

Duke u thirrur në informacione të marra nga organet kompetente, portali shkruan se tre diplomatët rusë kryenin aktivitete që janë në kundërshtim me Konventën e Vjenës për Marrëdhënie Diplomatike dhe në pesë ditët e ardhshme do të duhet të largohen nga territori i Republikës së Maqedonisë së Veriut.

Po ashtu raportohet se organe të tjera të specializuara të sigurisë e kanë dëbuar edhe priftin e Kishës Ruse që ka vepruar në Maqedoninë e Veriut, V. Zmej.

Lufta diplomatike që Rusia po mundohet ta shtrijë në Maqedoninë e Veriut është ashpërsuar sidomos pas anëtarësimit të Maqedonisë së Veriut në NATO.

Ndërkohë Maqedonisa e Veriut është duke treguar vigjilente në ruajtjen e sovranitetit të saj nga sjellja dhe agresioni rus në vend.

Që nga viti 2018, kur Maqedonia e Veriut nënshkroi Marrëveshjen e Prespës me Greqinë që i hapi rrugën integrimit në NATO, nga Shkupi janë dëbuar gjithsej 17 diplomatë të Federatës Ruse.

Më 15 prill të këtij persona non grata u shpallën gjashtë punonjës të Ambasadës Ruse në Shkup. Këta gjashtë diplomatë rusë poashtu kishin kryer aktivitete që janë në kundërshtim me Konventën e Vjenës për Marrëdhënie Diplomatike.

Ministria e Jashtme dëboi edhe pesë diplomatë rusë më 28 mars të këtij viti, një muaj pas fillimit të pushtimit rus në Ukrainë. Më parë dëboi nga një diplomat rus në vitin 2021 dhe 2018, të cilave Rusia iu përgjigj reciprokisht, duke dëbuar diplomatët maqedonas nga ambasada në Moskë.

Më 7 mars të këtij viti, Rusia e futi Maqedoninë në listën e vendeve që ndërmarrin veprime armiqësore kundër Rusisë, kompanive dhe qytetarëve të saj.