Gazetarët rusë të etiketuar si ‘agjentë të huaj’, të arrestuar dhe të sulmuar gjatë raportimit

Autoritetet ruse duhet të ndalojnë ngacmimin e anëtarëve të shtypit dhe etiketimin e tyre si agjentë të huaj, duhet të hetojnë tërësisht të gjitha sulmet ndaj gazetarëve dhe të sigurojnë që media të mund të funksionojë lirshëm, tha të hënën Komiteti për Mbrojtjen e Gazetarëve.

Të premten, më 8 prill, Ministria Ruse e Drejtësisë etiketoi tre gazetarë—korrespondenten e gazetës së pavarur Novaya Gazeta, Iryna Borukhovich; Ekaterina Mayakovskaya, një reportere për transmetuesin e financuar nga Kongresi i SHBA-së Radio Evropa e Lirë/Radio Liberty projekti Rusi Idel.Realii; dhe Andrei Filimonov, një kontribues në një nga projektet tjera të Radios Evropa e Lirë në Rusi, Sibir.Realii, si “agjentë të huaj të medias”, sipas raporteve të shumta të lajmeve.

Të nesërmen, rregullatori shtetëror i medias Roskomnadzor bllokoi uebsajtet e pavarura të lajmeve Holod dhe Discours.io, sipas deklaratave nga të dyja mediat.

Në një tjetër rast, të premten, policia ndaloi për një kohë të shkurtër Yevgeny Levkovich, një reporter për Radio Svoboda, shërbimi rus i RFE/RL, në shtëpinë e tij në Moskë dhe e akuzoi atë për “diskreditim të ushtrisë”, sipas raporteve të lajmeve dhe postimeve në Facebook nga Levkovich.

Dhe të dielën, më 10 prill, dy persona të paidentifikuar sulmuan Vasiliy Vorona, një korrespondent i uebsajtit të pavarur të lajmeve Sota.Vision, teksa po intervistonte njerëz në Moskë, sipas një raporti nga Sota.Vision dhe redaktori i gazetës Aleksey Obukhov, i cili foli me CPJ përmes aplikacionit për mesazheve.

“Bllokimi i faqeve të internetit, ndalimi i gazetarëve, shtimi i tyre në listën e agjentëve të huaj; në Rusi, autoritetet do të përdorin qartë të gjitha mjetet në dispozicion për të mbytur raportimin e pavarur”, tha Gulnoza Said, koordinatore e programit të CPJ-së për Evropën dhe Azinë Qendrore. Autoritetet ruse duhet të heqin të gjitha akuzat kundër Yevgeny Levkovich, të shfuqizojnë menjëherë ligjin e tyre arbitrar për të ashtuquajturit agjentë të huaj dhe të hetojnë me shpejtësi sulmin e fundit ndaj gazetarit Vasiliy Vorona.

Para se të etiketohej si agjent i huaj, Borukhovich kohët e fundit kishte mbuluar luftën e Rusisë kundër Ukrainës për Novaya Gazeta. CPJ nuk ishte në gjendje të gjente menjëherë shembuj të punës së Mayakovskaya ose Filimonov pas mesit të shkurtit. Rusia nisi pushtimin e saj në shkallë të plotë më 24 shkurt.

Individët në listën e agjentëve të huaj duhet të paraqesin rregullisht raporte të detajuara për aktivitetet dhe shpenzimet e tyre tek autoritetet, dhe sipas ligjit, statusi i tyre duhet të listohet sa herë që prodhojnë përmbajtje ose përmenden në artikuj lajmesh. Mospërputhja mund të çojë në një dënim me dy vjet burg.

Në fillim të këtij muaji, Roskomnadzor bllokoi gjithashtu faqet e internetit të medias Wonderzine dhe It’s My City, sipas raportimeve nga të dyja mediat.

Në Moskë, policia e ndaloi Levkoviçin për rreth pesë orë në stacionin e policisë Teply Stan dhe e akuzoi atë sipas nenit 20.3.3 të kodit administrativ për gjoja diskreditim të ushtrisë; dënimet për atë vepër mund të kenë një gjobë deri në 50,000 rubla (613 USD).

Levkovich shkroi në Facebook se gjyqi i tij ishte caktuar për të hënën, por ai nuk kishte në plan të merrte pjesë sepse nuk shihte arsye në kundërshtimin e akuzës.

Radio Svoboda shkroi se akuza kishte të ngjarë të lidhej me postimet e Levkovich në mediat sociale, por nuk tha nëse autoritetet kishin specifikuar ndonjë postim që shkaktonte akuzën. Në faqen e tij personale në Facebook, ku ka rreth 36,000 ndjekës, Levkovich së fundmi shkroi për luftën e Rusisë kundër Ukrainës.

Në incidentin ku përfshihej Vorona, sulmuesit e paidentifikuar i thyen syzet dhe i plagosën hundën, duke thënë se “dukej i dyshimtë” derisa ai po intervistonte njerëz në Moskë për mungesën e ushqimit dhe pasojat e tjera të luftës, sipas Obukhov dhe raportit të Sota.Vision.

Policia i ndaloi të dy sulmuesit dhe i solli ata, së bashku me gazetarin, në stacionin policor të Yasenevo; kur mbërriten atje, policia e pyeti Voronën nëse ai kishte ndonjë lidhje me Novaya Gazeta, i tha Obukhov CPJ.

Obukhov tha se policia i liroi sulmuesit më vonë të dielën dhe nuk e transferoi rastin në Komitetin Hetimor, ku hetohen shkeljet e kodit penal. Obukhov i tha CPJ-së se “policia po përpiqet të bëjë të pamundurën për të kthyer gjithçka në një çështje administrative”.

Ai shtoi se Sota.Vision kishte kërkuar nga prokuroria që të hapet një hetim për sulmin sipas nenit 144 të Kodit të Procedurës Penale, i cili i detyron autoritetet të verifikojnë çdo raportim për një krim, por ai nuk kishte marrë asnjë përgjigje.

CPJ i dërgoi email Ministrisë Ruse të Drejtësisë dhe shërbimit të shtypit të Roskomnadzor për koment, por nuk mori asnjë përgjigje. CPJ nuk ishte në gjendje të kontaktonte Ministrinë e Brendshme ruse për koment, pasi uebfaqja e saj nuk u hap.