Deputeti ukrainas: Serbët e mbështesin Rusinë, nuk do të jemi në gjendje ta tërheqim Serbinë në anën tonë

Deputeti i Parlamentit të Ukrainës Oleksiy Goncharenko ka potencuar se shumica e popullësisë në Serbi e mbështesin Rusinë dhe se Ukraina nuk mund ta kthejë në anën e vet Serbinë.

“Zelensky u takua me Presidentin e Serbisë. Serbia është aleate e Rusisë. Ne nuk do të mund ta tërheqim Serbinë në anën tonë. Dhe kjo nuk është për shkak se ne jemi shumë të këqij, por sepse popullsia e Serbisë mbështet Rusinë në një shumicë të pabesueshme. A duhet të takohemi atëherë? Po sigurisht. A duhet të kompromentojmë parimet tona? Jo. Ukraina duhet ta njohë pavarësinë e Kosovës”, ka shkruar ai për takimin mes Zelenskyt dhe Vuçiçit që u mbajt në Athinë të Greqisë.

Për raportin e pasinqertë të Serbisë ndaj Ukrainës kishte folur edhe ambasadori i Ukrainës në Serbi.

Volodymyr Tolkac përmendur ndihmën e Serbisë që po i ofron Rusisë për t’i vrarë ukrainasit në agresionin e saj të nisur në shkurt të vitit të kaluar.

“Në shtypin serb shfaqen informacione për kompani private serbe që ndihmojnë agresorin rus të anashkalojë sanksionet duke furnizuar me pjesë për raketa dhe dronë që vrasin ukrainasit. Prandaj, i bëjmë thirrje edhe një herë vendit kandidat të BE-së, Serbisë, të ndryshojë politikën e saj të jashtme, veçanërisht për sa i përket agresionit të Federatës Ruse ndaj vendit tjetër kandidat – Ukrainës. Kjo politikë përputhet me qëndrimin e familjes së përbashkët europiane. Jam i bindur se çdo hap praktik i palës serbe për të mbështetur Ukrainën në luftën e saj kundër agresionit rus do të jetë një argument i fortë për mbrojtjen e integritetit territorial dhe sovranitetit të Serbisë”, ka thënë Tolkac.

Vëllazëria mes serbëve dhe rusëve u shfaq edhe përmes një billbordi gjigant në mes të Moskës përballë Rossiya Segodnya, konglomerat mediatik shtetëror i Rusisë.

Ndërkohë takimi i Zelenskyt me Vuçiçin u zhvillua në hijen e raportimeve të shumta për dërgimin e armëve në Rusi nga Serbia e të cilat më pas përdoren për vrasjen edhe të civilëve ukrainas.