Sllagjan Trajkoviq dënohet me dhjetë vjet burgim për krime lufte në Vushtrri

Gjykata Themelore në Prishtinë ka shpallur aktgjykim dënues ndaj Sllagjan Trajkoviqit, duke e dënuar atë me dhjetë (10) vjet burgim për krime lufte të kryera në komunën e Vushtrrisë gjatë luftës së fundit në Kosovë.

Trupi gjykues e shpalli Trajkoviqin fajtor për një pikë të aktakuzës, ndërsa për tri pika të tjera konstatoi se nuk është vërtetuar se ai i ka kryer veprimet për të cilat akuzohej. Sipas vendimit, në dënimin e shqiptuar do t’i llogaritet edhe koha e kaluar në paraburgim.

Prokuroria Speciale e Republikës së Kosovës ka mirëpritur vendimin e gjykatës, duke theksuar se mbetet e përkushtuar në ndjekjen penale të krimeve të luftës në Kosovë, “me qëllim sigurimin e drejtësisë për viktimat dhe vendosjen e përgjegjësisë penale për kryerësit, në përputhje me standardet ndërkombëtare”.

Aktakuza ndaj Trajkoviqit ishte ngritur më 12 korrik 2023 nga Prokuroria Speciale, pas arrestimit të tij më 15 dhjetor 2022. Pas arrestimit, autoritetet në Serbi kishin deklaruar se Trajkoviq ishte ish-pjesëtar i Policisë së Kosovës.

Sipas Prokurorisë Speciale, krimet për të cilat Trajkoviq u akuzua janë kryer gjatë viteve 1998–1999 në fshatin Reznik të komunës së Vushtrrisë dhe në fshatrat përreth. Aktakuza e ngarkonte atë se, si pjesëtar i forcave policore dhe ushtarake serbe, kishte kontribuar në vrasje, bastisje, rrahje, maltretime, arrestime, torturë, trajtim mizor dhe çnjerëzor, mbajtje në kushte skllavërie, si dhe në dëbimin masiv të civilëve shqiptarë. Po ashtu, ai akuzohej për plaçkitje, djegie dhe shkatërrim të shtëpive të popullsisë civile shqiptare.

Në vitet e fundit, institucionet e Kosovës kanë intensifikuar ndjekjen penale të krimeve të luftës, përfshirë rritjen e numrit të aktakuzave në mungesë dhe shqiptimin e aktgjykimeve për këto vepra.

Në gusht të këtij viti, Prokuroria Speciale dorëzoi në gjykatë një aktakuzë në mungesë kundër 21 të dyshuarve për dëbimin me forcë të mbi 800 mijë civilëve shqiptarë nga Kosova gjatë luftës.

Gjatë luftës në Kosovë, në periudhën 1998–1999, u vranë mbi 13 mijë civilë, ndërsa mijëra të tjerë u zhdukën. Rreth 1.600 persona vazhdojnë të figurojnë si të zhdukur, shumica prej tyre shqiptarë. Që nga përfundimi i luftës, dhjetëra persona janë dënuar për krime lufte para institucioneve vendore dhe ndërkombëtare./TheGeoPost.