Paraburgim për ish-pjesëtarin e MPB-së së Serbisë, i dyshuar për kidnapimin e Milan Vukashinoviqit në Kosovë

Gjykata Themelore në Mitrovicë i ka caktuar masën e paraburgimit prej një muaji ish-pjesëtarit të Ministrisë së Punëve të Brendshme (MPB) të Serbisë, i dyshuar për përfshirje në rastin e rrëmbimit të shtetasit të Kosovës, Milan Vukashinoviq.

Sipas njoftimit zyrtar, të pandehurit me inicialet V.M. i është caktuar masa e paraburgimit në kohëzgjatje prej një muaji, e cila do të llogaritet nga data 20 dhjetor 2025 deri më 19 janar 2026.

I dyshuari është arrestuar më 20 dhjetor 2025 në fshatin Leshak, në një operacion të përbashkët të Policisë së Kosovës dhe Agjencisë së Kosovës për Inteligjencë (AKI), nën dyshimet se ka qenë i përfshirë në kidnapimin e Milan Vukashinoviqit më 1 nëntor 2025.

Ministri në detyrë i Punëve të Brendshme, Xhelal Sveçla, bëri të ditur se i arrestuari kishte qenë pjesëtar i MPB-së së Serbisë dhe më pas ishte integruar në Policinë e Kosovës sipas Marrëveshjes së vitit 2013, nga ku kishte dhënë dorëheqje. Sipas Sveçlës, ekzistojnë dyshime të bazuara se ai ka bashkëpunuar dhe ka mbështetur vazhdimisht strukturat e sigurisë së Serbisë.

“Dyshohet se i arrestuari ka qenë i përfshirë në kidnapimin e Millan Vukashinoviqit, i cili gjatë rrëmbimit është plagosur rëndë dhe aktualisht po trajtohet në një spital në Serbi,” ka deklaruar Sveçla.

Ministri në detyrë shtoi se Vukashinoviq dyshohet se ka pasur kontakte me strukturat e inteligjencës dhe ushtrisë së Serbisë, se ka përgatitur të rinj serbë për trajnime në bashkëpunim me pjesëtarë të ushtrisë serbe, si dhe se së paku ka qenë në dijeni për përgatitjet e sulmit terrorist në Banjskë.

Pas urdhëresës së Gjykatës, autoritetet kanë bastisur shtëpinë dhe objektet përcjellëse të të dyshuarit, ku janë gjetur dhe sekuestruar nëntë telefona celularë, një laptop, tre dokumente në format A4, një pushkë gjuetie me 39 fishekë, një jelek për fishekë dhe një tytë arme.

Policia e Kosovës ka njoftuar se Millan Vukashinoviq, shtetas i Republikës së Kosovës i nacionalitetit serb, dyshohet se është plagosur dhe rrëmbyer brenda territorit të Kosovës, në afërsi të Leposaviqit, nga xhandarmëria serbe më 1 nëntor 2025.

Lidhur me këtë rast, Prokuroria e Mitrovicës ka intervistuar nënën e viktimës dhe persona të tjerë të afërt. Mediat raportuan se një ditë pas incidentit, ministri në detyrë i Punëve të Brendshme kishte inspektuar zonën kufitare ku dyshohet se ndodhi rrëmbimi.

Sveçla ka deklaruar se Vukashinoviq është rrëmbyer për shkak të kundërshtimit të tij ndaj Listës Serbe dhe se po trajtohet në një spital në Nish të Serbisë, duke shtuar se atij po i mohohet mbrojtja ligjore. Ai ka bërë thirrje që bashkësia ndërkombëtare të rrisë presionin ndaj Serbisë dhe të ndërmarrë masa ndëshkuese për, siç është shprehur, parandalimin e veprimeve destabilizuese në rajon.

Sipas informatave, ndaj Vukashinoviqit kishte pasur edhe më herët sulme dhe kërcënime, përfshirë një sulm me eksploziv ndaj veturës së tij rreth një vit e gjysmë më parë.

Autoritetet e Kosovës kanë theksuar se hetimet lidhur me rastin e plagosjes dhe rrëmbimit janë duke vazhduar./TheGeoPost.