Beogradi ndërhyn sërish në zgjedhjet e Kosovës: Punësime në institucionet paralele në këmbim të votës

Serbia ka vazhduar lojën e saj për ndërhyrje në zgjedhjet e 28 dhjetorit në Kosovë dhe të ndikojë në votën e lirë, nëpërmjet punësimit.

Një shpallje e një konkursi nga Ministria e Shëndetësisë e Qeverisë së Serbisë për 350 vende të reja pune në institucionet paralele shëndetësore serbe në Kosovë, vjen në një moment politikisht të ndjeshëm – në prag të zgjedhjeve të jashtëzakonshme që do të mbahen në Kosovë.

Sipas njoftimit zyrtar të qeverisë serbe, siç shkruan radio serbe “kim”, ‘bëhet fjalë për 300 vende të reja pune të shpallura së fundmi dhe 50 të tjera nga një konkurs i hapur më 22 dhjetor 2025’, të gjitha në kuadër të të ashtuquajturit sistem shëndetësor serb në Kosovë.

Në Beograd, këtë veprim e paraqesin këtë si “kujdes për popullin serb” dhe si mbështetje për qëndrimin e tyre në Kosovë, KosovaPress mëson nga burime të veta se “buxheti i ndarë për këto konkurse nuk mund të mbulojë këto konkurse, Serbia ka fryrë numrin e tyre me qëllim të ndikimit te serbët e Kosovës për të marrë më shumë vota për Listën Serbe.”

Kjo nuk është hera e parë që Beogradi vepron në këtë mënyrë. Edhe gjatë zgjedhjeve të kaluara, ishte vetë presidenti i Serbisë, Aleksandar Vuçiq, ai që publikisht njoftonte hapjen e vendeve të reja të punës në institucionet paralele në Kosovë, duke i përdorur këto masa si instrument politik në momente kyçe zgjedhore.

Hapja e vendeve të punës në institucionet paralele pikërisht gjatë fushatës zgjedhore ngre dyshime për përdorim politik të punësimeve, me qëllim ndikimin në vullnetin elektoral të komunitetit serb në Kosovë.