Ambasada e Kosovës në Hagë prezanton dokumentar për 15-vjetorin e opinionit të GJND-së mbi pavarësinë

Një dokumentar i veçantë në shënim të 15-vjetorit të vendimit këshillëdhënës të Gjykatës Ndërkombëtare të Drejtësisë (GJND), që konfirmoi se shpallja e pavarësisë së Kosovës nuk përbënte shkelje të së drejtës ndërkombëtare është publikuar të martën nga Ambasada e Republikës së Kosovës në Hagë.

Në videon e shpërndarë në Facebook, Ambasada ka theksuar rëndësinë e vazhdueshme të këtij vendimi historik, duke e cilësuar atë si një moment me peshë të madhe ligjore, politike e diplomatike.

“Në këtë përvjetor historik, me krenari paraqesim një video dokumentar që reflekton mbi Opinionin Këshillimor të vitit 2010 të Gjykatës Ndërkombëtare të Drejtësisë lidhur me Deklaratën e Pavarësisë së Kosovës”, thuhet në njoftim.
Në këtë dokumentar pikëpamjet e tyre për ndikimin që ky opinion ka pasur në të drejtën ndërkombëtare kanë ndarë diplomatë, juristë ndërkombëtarë dhe akademikë.

https://www.facebook.com/kosovo.in.netherlands/videos/1085372239649236
/The Geopost/