Abazovic për CNN: Gjithmonë ka pasur shumë ndikim negativ rus në Mal të Zi

Kryeministri i Malit të Zi, Dritan Abazoviq, tha se Qeveria e Malit të Zi po përpiqet në çdo mënyrë ta ndihmojë Ukrainën në luftën me Rusinë dhe se zgjidhjen e sheh në dialogun mes dy palëve. Në një intervistë për CNN, Abazovic tha se përvoja e Malit të Zi ka treguar se forcat proruse në Mal të Zi nuk janë aq të forta sa në periudhën e kaluar.

“Mali i Zi po përpiqet të kontribuojë për paqen dhe ka një pozicion të qartë kur bëhet fjalë për politikën e jashtme – ne dënojmë agresionin rus dhe qeveria jonë ka bërë shumë për popullin ukrainas. Ne kemi më shumë se 10 mijë refugjatë në Mal të Zi dhe të gjithë po ndihen mirë, ata po qëndrojnë në vendin tonë pa asnjë problem. Shpresojmë që situata të mos jetë e tillë për një kohë të gjatë dhe se politika ruse do të çojë në përfundimin e luftës. Ky lloj agresioni është turp për njerëzimin”, tha Abazovic.

Sipas mediave malazeze, Abazovic kujtoi gjithashtu se ai bisedoi me Presidentin e Ukrainës, Volodymyr Zelensky, të enjten (9 qershor) dhe tha se qeveria kishte dhënë një lloj të ri ndihme në përputhje me kapacitetet e vendit.

“Kjo është e vërtetë. Ne jemi një vend i vogël, nuk kemi aq kapacitete, por ajo që mundemi dhe kemi bërë është të vendosim sanksione ndaj Rusisë dhe të ndihmojmë Ukrainën në përputhje me kapacitetet tona. Nuk jam aq i kënaqur sa kanë ndihmuar disa vende të tjera dhe shpresoj që të tjerët të bëjnë më shumë. I bëj thirrje të gjithëve të ndihmojnë. Mënyra e vetme është të ulemi në një tryezë dhe të gjejmë një zgjidhje për paqen përmes dialogut. Përdorimi i armëve dhe agresioni e ndërlikon situatën”, shtoi Abazovic.

Abazovic thotë se lufta në Ukrainë nuk është një luftë midis Ukrainës dhe Rusisë, por një konflikt vlerash.

“Është një luftë për liri dhe mundësi që njerëzit të zgjedhin stilin e tyre të jetesës. Ne në Ballkan e kuptojmë këtë sepse kemi pasur shumë ndikim negativ rus këtu dhe shumë luftë. Solidariteti ynë me Ukrainën është i madh, sepse ne ndjejmë se si ndihen ata për momentin. Por si në çdo situatë, dikush duhet të ulet dhe të gjejë një zgjidhje. Nuk duam të besojmë se kjo luftë do të shkojë deri në fund sepse nuk do të ketë fitues në atë rast”, theksoi Abazoviq, duke shtuar se Mali i Zi nuk do të japë rekomandime se si dikush do ta bëjë politikën e tij.