Vuçiq dhe Ministria e Brendshme e Serbisë dezinformojnë: Policë të Kosovës kaluan kufirin me Serbinë

Ministria e Brendshme e Serbisë dhe më pas presidenti serb Aleksandar Vuçiq, kanë dezinformuar se një grup i policëve të Kosovës të armatosur rëndë kanë kaluar kufirin me Serbinë. Vuçiq dezinformoi se Kurti ka urdhëruar qëllimisht kalimin e paligjshëm.

Çka deklaroi Vuçiq dhe MPB?

Ministria e Mbrojtjes e Serbisë ka thënë se një grup i policëve të Kosovës, të armatosur rëndë, kanë kaluar në mënyrë të paautorizuar vijën kufitare në fshatin Çirkoviq, në Leposaviq.

“Kalimi i paautorizuar i vijës administrative paraqet provokim të rrezikshëm dhe kërcënim për paqen. Ushtria serbe po vëzhgon situatën në terren dhe janë të gatshëm të reagojnë në bazë të Marrëveshjes Ushtarako-Teknike të Kumanovës. Ministria e Mbrojtjes kërkon nga KFOR-i, si forca e vetme legale dhe legjitime ushtarake në territorin e Kosovës, që të marrë masa në përputhje me mandatin e tij dhe të parandalojë autoritetet e përkohshme të Prishtinës në përpjekjet për të shkaktuar përshkallëzim të dhunës”, tha Ministria serbe e Mbrojtjes.

Ndërsa, Vuçiq tha: “Nuk pres asnjë reagim, përveç se pres reagim nga amerikanët. Amerikanët e dinë që Kurti e ka urdhëruar me qëllim. Ai priste që këta njerëz të likuidoheshin dhe kjo do të ishte arsyeja e tij për ta futur NATO-n në konflikt me Serbinë”,

Ai deklaroi kështu për RTS-në kur u pyet se çfarë reagimi pret KFOR-i.

“Herën tjetër do të reagojmë në përputhje me rregullat e plota të shërbimit dhe kërkojmë nga amerikanët të na informojnë nëse kemi të drejtë kur themi se Kurti personalisht ka urdhëruar provokimin dhe depërtimin e forcave të tij të armatosura në territorin e Serbisë qendrore, në zonën e Çirkoviqit”, tha Vuçiq.

Analiza:

Policia e Kosovës ka mohuar kategorikisht se policë të saj kanë kaluar vijën kufitare me Serbinë.

“Policia e Kosovës (PK), me qëllim të informimit të drejt të opinionit dhe qytetarëve, reagon ndaj disa shkrimeve të publikuara kryesisht në media serbe, e të cilat i referohen një njoftimi të Ministrisë së Mbrojtjes së Serbisë, se kinse sipas tyre një grup pjesëtarësh të armatosur rëndë të Policisë së Kosovës kanë kaluar në mënyrë të paautorizuar vijën kufitare me Serbinë në veri të vendit. Shkrimet e tilla të referuara në njoftimin e Ministrisë së Mbrojtjes së Serbisë, janë të pavërteta dhe nuk qëndrojnë. Andaj këto shkrime dhe njoftimi i publikuar si i tillë, është një dezinformacion i cili ka për qëllim të krijoj pasiguri te qytetarët e asaj zone dhe të njollosë punën e Policisë së Kosovës. Policia e Kosovës, si institucion i besueshëm dhe transparent do kujdeset në vazhdimësi që të ofrojë informacione zyrtare për media dhe opinionin e gjerë, kurdo që ato kërkohen dhe janë të nevojshme për media dhe publikun”, ka thënë Policia e Kosovës në demantimin e dezinformatave nga Beogradi.

/The Geopost