Macron paralajmëron Evropën: Rusia do të shtojë provokimet kundër vendeve të NATO-s

Presidenti francez, Emmanuel Macron, ka paralajmëruar se Rusia mund të intensifikojë provokimet dhe presionin ndaj vendeve evropiane, me synimin për t’i bindur ato të heqin dorë nga mbështetja për Ukrainën.

Macron i bëri komentet pasi mori pjesë përmes videokonferencës në takimin e Koalicionit të Vullnetit, të mbajtur këtë pasdite në Kiev.

Sipas presidentit francez, strategjia e Moskës mund të jetë përshkallëzimi i tensioneve ndaj vendeve evropiane dhe aleatëve të NATO-s, në përpjekje për të dobësuar mbështetjen perëndimore për Kievin.

“Është e qartë se vendet e NATO-s do të jenë në shënjestër dhe se provokimet do të shumëfishohen”, ka paralajmëruar Macron.

Ai u ka bërë thirrje vendeve evropiane që të mos bien pre e presionit apo kërcënimeve ruse dhe të vazhdojnë ndihmën për Ukrainën.

“Duhet të qëndrojmë të qetë dhe të vazhdojmë”, ka theksuar presidenti francez, duke iu referuar mbështetjes ushtarake dhe politike për Kievin.

Deklaratat e Macronit vijnë pas kërcënimeve të fundit të Moskës ndaj Mbretërisë së Bashkuar. Rusia ka akuzuar Londrën se po pengon përpjekjet për arritjen e paqes në Ukrainë.

Tensionet u shtuan pasi Mbretëria e Bashkuar njoftoi se do të ndihmonte Ukrainën në zhvillimin dhe prodhimin e raketave të saj me rreze të gjatë veprimi, duke ofruar të dhëna dhe mbështetje teknike.

Kremlini reagoi ashpër ndaj këtij njoftimi, duke paralajmëruar Londrën se ushtria ruse do të përpiqej të identifikonte vendet ku do të prodhoheshin raketat dhe më pas t’i shkatërronte ato.

Paralajmërimi i Macronit e vendos edhe një herë në qendër të vëmendjes shqetësimin e vendeve evropiane për mundësinë e zgjerimit të përballjes hibride mes Rusisë dhe Perëndimit, përmes kërcënimeve, provokimeve dhe presionit ndaj vendeve që vazhdojnë të mbështesin Ukrainën.

The GeoPost